सावंतवाडी (सिंधुदुर्ग) : दुचाकी पार्क करण्याच्या वादावरून दोघांमध्ये झालेले भांडण सोडविण्यास गेलेल्या दोन तरुणांवर चाकूने हल्ला करण्यात आला. त्यात दोघे तरुण गंभीर जखमी झाले आहेत. सावंतवाडी येथील मच्छीमार्केट परिसरात रविवारी रात्री साडे अकरा वाजता ही घटना घडली. चेतन पुरुषोत्तम देऊलकर आणि संतोष वागळे अशी जखमींची नावे आहेत. तर या प्रकरणात संबंधित दोघांवर चाकुहल्ला करणारे महेश कृष्णा दाभोलकर ( वय ४९), कुशल महेश दाभोलकर (वय २३) जुनाबाजार, सावंतवाडी या दोघांनाही अटक करण्यात आली. 

हेही वाचा - बापरे ! चिपळूणात चक्क गुटखा निर्मितीचे कारखाने -

घडलेली घटना अशी, रविवारी रात्री साडे अकरा वाजता मच्छीमार्केट परिसरात दुचाकी पार्क करण्याच्या वादावरून दोघांमध्ये भांडण लागले. वाद सोडवायला गेलेल्या दोघांवर चाकूने हल्ला केला गेला. हा हल्ला झाल्याचा प्रकार लक्षात येताच तेथील काही स्थानिक नागरिकांनी घटनास्थळी धाव घेतली. याबाबत पोलिसांना पाचारण करण्यात आले. पोलिसांनी संबंधित संशयितांना हल्ला केल्याप्रकरणी ताब्यात घेतले आहे. या हल्ल्यात जखमी झालेल्या दोघांना कापडणे येथील उपजिल्हा रुग्णालयात उपचारासाठी हलविण्यात आले. या घटनेशी संबधित पुढील तपास सहाय्यक पोलीस निरीक्षक सय्यद करीत आहेत. 

संपादन - स्नेहल कदम