तळेरे (सिंधुदुर्ग) - येथील आनंदनगरमार्गे आयरेवाडी- देऊलकरवाडीत जाणाऱ्या रस्त्याची दुर्दशा झाली आहे. त्यामुळे कासार्डेतील एकमेव सुरक्षित असलेला रस्ताही आता वाहतुकीस धोकादायक बनला आहे. 

पंतप्रधान ग्रामसडक योजनेंतर्गत या रस्त्याचे चार वर्षांपूर्वी सार्वजनिक बांधकाम विभागातर्फे साधारण सहा किलोमीटरचा हा रस्ता तयार केला असून प्रत्येकवर्षी हा रस्ता दयनीय होतो. संबंधित ठेकेदाराकडून प्रतिवर्ष थोड्या प्रमाणात मलमपट्टी केली जाते. पुन्हा प्रतिवर्षी येरे माझ्या मागल्या या उक्तीप्रमाणे यावर्षीही अनेक ठिकाणी या रस्त्यावर असंख्य खड्डे पडले आहेत. साईडपट्टीवर मोठ्या प्रमाणात गवताचे साम्राज्य वाढले आहे.

पुलावरही मोठ्या प्रमाणात गवत रूजले आहे. अनेक ठिकाणी रस्त्यावर पाणी साचून राहते त्यामुळे खड्यांमध्ये वाढच होत आहे. हा रस्ता पंतप्रधान ग्रामसडक योजनेअंतर्गत असूनही अनेक ठिकाणी गटाराचा पत्ता नाही. तरीही शासनाकडून संबंधित ठेकेदाराला बिल कसे अदा केले? असा प्रश्‍न ग्रामस्थांमधून विचारला जात आहे. संबंधित ठेकेदाराकडून देखभालीचे हे अंतिम वर्ष असून निदान या वर्षीतरी हा रस्ता व्यवस्थित करण्यासाठी विशेष करून सार्वजनिक बांधकाम खात्याने लक्ष घालावे, अशी मागणी कासार्डे ग्रामस्थांकडून केली जात आहे.  

संपादन - राहुल पाटील