बांदा (सिंधुदुर्ग) - बांदा पोलिसांनी बेकायदा दारू वाहतुकी विरोधात आज मोठी कारवाई केली. सिंधुदुर्ग-गोवा सीमेवर पत्रादेवी तपासणी नाक्यावर गोव्याहून गुजरातच्या दिशेने कँटर मधून होणाऱ्या दारू वाहतुकीवर कारवाई करत २० लाख ३४ हजारच्या दारुसह तब्बल ३२ लाख ३४ हजार रुपये किमतीचा मुद्देमाल जप्त केला. गाडी तपासणीसाठी थांबविताच काळोखाचा फायदा घेत चालक व क्लिनर फरारी झालेत. ही कारवाई मध्यरात्री दीड वाजण्याच्या सुमारास करण्यात आली.

वाचा - 'ते' मुंबईतील रेड झोन मधून गावात आले, सोबत आणलेल्या व्यक्तीवर अंत्यसंस्कार केले अन् झाले गायब...

गोव्याहून गुजरातच्या दिशेने जाणाऱ्या कँटर (जीजे ०६, एझेड ५५३५) मध्ये लोखंडी अँगल भरण्यात आले होते. गाडीत मिळालेल्या पावत्यांमध्ये वडोदरा-गुजरात येथील एका कंपनीच्या नावे बनावट कागदपत्रे तयार करण्यात आली होती. तपासणी नाक्यावरील पोलीस कर्मचारी राजेंद्र शेळके यांना संशय आल्याने त्यांनी गाडी तपासणी करण्यासाठी थांबविली. गाडीच्या पाठीमागील हौद्यात लोखंडी अँगलच्या खाली गोवा बनावटीच्या दारूचे बेकायदा खोके आढळले. पोलिसांनी २० लाख ३४ हजार रुपये किमतीच्या गोवा बनावटीच्या दारूचे २५९ खोके व १२ लाख रुपये किमतीचा कँटर जप्त केला. ही कारवाई पोलीस निरीक्षक अनिल जाधव यांच्या मार्गदर्शनाखाली करण्यात आली. अलीकडच्या काळातील ही बेकायदा दारू वाहतुकी विरोधातील सर्वात मोठी कारवाई आहे.