राजापूर - तालुक्यातील बारसू परिसरातील प्रस्तावित रिफायनरी प्रकल्पासाठी आवश्यक असलेल्या माती परीक्षणाचे काम संपले असून, त्यामध्ये सुमारे ६७ कूपनलिका (बोअरवेल) खोदण्यात आल्या आहेत.
आगामी सुमारे २ महिन्यांमध्ये माती परीक्षणाचा अहवाल येणार असून, त्यानंतर प्रकल्पाच्या अनुषंगाने पुढील कार्यवाही करण्यात येणार असल्याचे सांगितले जात आहे. दरम्यान, माती परीक्षणावेळी बारसू परिसराच्या सड्यावर तैनात करण्यात आलेला पोलिस बंदोबस्त आता हटवण्यात आला असून, त्यामुळे गेल्या १५ दिवसांपासून धुमसत असलेला हा परिसर काहीसा शांत झाला आहे.
तालुक्यातील नाणार परिसरातील लोकांच्या विरोधामुळे चर्चेत आलेला रिफायनरी प्रकल्प बारसू परिसरामध्ये उभारण्याच्या हालचाली सुरू झाल्या आहेत. या प्रकल्पाच्या उभारणीच्या अनुषंगाने बारसू परिसराच्या सड्यावर माती परीक्षणाचे काम हाती घेण्यात आले होते. त्याला लोकांकडून विरोध करण्यात आला. त्यानंतर, प्रकल्प समर्थन आणि विरोध याच्यावर जोरदार आरोप-प्रत्यारोपाच्या फैरीही झडल्या होत्या.
त्यामुळे प्रस्तावित रिफायनरी प्रकल्पावरून चांगलेच वातावरण तापले होते. अशा स्थितीतही प्रशासनाने पोलिस बंदोबस्तामध्ये माती परीक्षणासाठी ड्रिलिंगचे काम पूर्ण केले आहे. यामध्ये बारसू, धोपेश्वर, पन्हळेतर्फे राजापूर आदी परिसरात सुमारे ६७ ड्रील करण्यात आल्या असून, त्यापूर्वी नाटे परिसरामध्ये १८ ड्रील पूर्ण करण्यात आल्या आहेत. सद्यःस्थितीत ड्रिलिंगचे काम पूर्ण झाले असून, त्याचा सुमारे दोन महिन्यांमध्ये अहवाल प्राप्त होणार असल्याचे सांगितले जात आहे. माती परीक्षणाचा हा अहवाल नेमका कसा येणार याकडे आता साऱ्यांचे लक्ष लागले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.