चिपळूण (रत्नागिरी) : शहरातील इंदिरा गांधी सांस्कृतिक केंद्राच्या नूतनीकरणात खुर्ची घोटाळा झाल्याचे आज गुरुवारी झालेल्या विशेष सभेत उघडकीस आले. ते प्रशासनाने मान्यही केले. केंद्राच्या अन्य कामामध्ये देखील अनियमितता आणि वाढीव खर्च झाल्याचे महाविकास आघाडीच्या नगरसेवकांनी सभागृहासमोर आणले. याविषयाची संपूर्ण चौकशी महिन्याभरात पूर्ण करावी. तांत्रिक आणि कायदेशीर बाबी देखील महिन्याभरात पूर्ण करून उद्‌घाटनाचा मुहूर्त काढावा, असा ठराव महाविकास आघाडीने मांडला.

२२ लाखाचा घोटाळा
चौकशी ८ दिवसांत पूर्ण करावी. त्यात सर्व अधिकारी आणि नगरसेवकांची देखील चौकशी व्हावी. अशी उपसूचना भाजपकडून मांडण्यात आली. यावेळी ठरावाच्या बाजूने २१ मते तर उपसूचनेच्या बाजूने ५ मते पडली. त्यामुळे उपसूचना फेटाळण्यात आली. विशेष सभा सुरू होताच महाविकास आघाडीच्या नगरसेवकांनी जोरदार शाब्दिक हल्ला करण्यास सुरुवात केली. सेनेचे शशिकांत मोदी यांनी सांस्कृतिक केंद्रात बसवण्यात आलेल्या खुर्च्या या अंदाजपत्रकात समाविष्ट असलेल्या खुर्च्या नाहीत, तर दुय्यम दर्जाच्या खुर्च्या असून संबंधित ठेकेदाराने पालिकेची फार मोठी फसवणूक केली आहे.

हेही वाचा- आंबा बागायतदारांनो, हापूसची घ्या काळजी!

ठेकेदाराने पालिकेची  केली फसवणूक

एक खुर्ची ८ हजार रुपये प्रमाणे खरेदी करण्यात आली त्या खुर्चीची मूळ किंमत फक्त ३ हजार ७०० रुपये आहे. हे पुराव्यासह सभागृहात दाखवून दिले. अंदाजपत्रकात जी खुर्ची आहे ती बसवलीच नाही. आशा प्रकारे सुमारे २२ लाख रुपयांचा घोटाळा झाल्याचे त्यांनी सभागृहात नमूद केले. नगराध्यक्षा खेराडे यांनीही असा घोटाळा झाला असेल तर सहन करणार नाही. वेळ पडली तर खुर्च्या काढायला लागल्या तरी तेही करेन असे सांगितले. मुख्याधिकारी डॉ. विधाते यांनी ही बाब वेळीच सभागृहासमोर आणायला पाहिजे होती. प्रशासनाकडून ही चूक झाली आहे, ते आम्ही मान्य करतो. या बाबत सभागृह जो निर्णय घेईल तो आम्हाला मान्य असेल असे सांगितले.

हेही वाचा- Coronaviras: इराणमध्ये अडकलेल्या या 9 युवकांना भारतात येण्याची लागली आस....

कारणीभूत प्रशासन, ठेकेदार 
खुर्ची घोटाळा उघड होताच सेना गटनेते उमेश सकपाळ म्हणाले, अशा अनेक चुका या कामात प्रशासनाने केल्या आहेत. अधिकार नसताना बांधकाम अभियंता बिले तयार करतात. निविदा प्रक्रियेत अनिमियता झाली. वाढीव कामे परस्पर झाली आहेत. हे सर्व प्रशासनाच्या चुकीमुळे झाले असताना बदनामी मात्र महाविकास आघाडीची केली जात आहे. महाविकास आघाडी शिवसेना सांस्कृतिक केंद्राला विरोध करत आहे असे चित्र लोकांसमोर तयार केले गेले. मात्र मूळ वेगळेच असल्याचे या सभागृहात समोर आले.आमच्या दोन मंत्र्यांना या विषयात लक्ष घालावे लागले. याला कारणीभूत प्रशासन आणि ठेकेदार आहे. हे लोकांसमोर तुम्हीच आता सांगा.