लांजा : तालुक्‍यात झालेल्या ढगफुटीसदृश पावसाने ठिकठिकाणी पूरपरिस्थिती निर्माण झाली होती. नद्या-नाल्यांना आलेल्या पुरामुळे अनेक ठिकाणची वाहतूक खंडित झाली. विलवडे येथे पुराच्या पाण्यात वाहून जाणारी गुरे ग्रामस्थांनी सुखरूपपणे बाहेर काढली.

चार दिवसांपूर्वी लांजा तालुक्‍यात पडलेल्या ढगफुटीसदृश पावसाने भातशेतीचे मोठे नुकसान झाले होते. पाठोपाठ बुधवारपासून (१४) सुरु झालेल्या पावसाचा जोर गुरुवारीही कायम होता. सतत कोसळणाऱ्या पावसामुळे मुचकूंदी नदीला पूर आला. दाभोळे कुरचुंब येथे वहाळावरुन पाणी जात होते. अक्षरशः नदीसारखे रूप आले होते. त्यामुळे सुमारे चार तास वाहतूक खंडित झालेली होती. विलवडे-खामकरवाडी येथे पुराचे पाणी नदीकाठच्या  वाडीत शिरले.

हेही वाचा -  कोकणात वादळी पाऊस चुलीवर; भाताच्या सुगीवर ! -

मुसळधार पावसामुळे भात शेती पाण्याखाली गेली असून मोठे नुकसान झाले होते. शनिवार सायंकाळपासून व रविवारी दिवसभर पडत असलेल्या पावसाने शेतकऱ्यांच्या तोंडचा घास हिरावून घेतो की काय यांची चिंता लागली आहे. पावसामुळे भातशेतीचे मोठे नुकसान झाले. संततधार कोसळणाऱ्या पावसाने उघडी प केल्याने व कडकडीत उन्ह पडल्यानंतर शेतकऱ्यांनी शेतामध्ये पिकलेली भातशेती कापणीला सुरुवात केली असतानाच पावसाच्या शक्‍यतेने शेतकरी धास्तावला.

रात्री ८ च्या दरम्यान पावसाचा जोर वाढला तो दुसऱ्या दिवशी रविवारी देखील राहिला. त्यामुळे कापणी केलेली भातशेती पावसामध्ये भिंजत राहिली आहे. सलग दोन दिवस पाण्यात तसेच पडून राहिल्याने भाताला धुमारे फुटू लागल्याने शेतीचे मोठे नुकसान झाले आहे.

हेही वाचा - गव्यांच्या कळपाने घेरल्यावरही तो डगमगला नाही ; सिंधुदुर्गातील स्पेशल चाइल्डची संघर्षमय कहाणी -

जीव धोक्‍यात घातल्यानेच जनावरे सुखरुप

बौध्दवाडीतील सुरेश मोहिते याची आठ गुरे पुराच्या पाण्यात अडकली होती. पुराच्या पाण्याने ती वाहून जाण्याचा धोका होता. आठ जनावरांचा जीव वाचवण्यासाठी पहाटेपासून युध्द पातळीवर प्रयत्न सुरू झाले. ही जनावरे वाचवण्यासाठी येथील ग्रामस्थांनी जीव धोक्‍यात घातला. आठ जनावरे पाण्याच्या प्रवाहातून वाचवण्यात त्यांना यश आले.

संपादन - स्नेहल कदम