कणकवली/सावंतवाडी : हवेत चांगलाच गारठा निर्माण झाल्याने सिंधुदुर्गवासीयांना थंडीची चाहूल लागली आहे. जिल्ह्याच्या अनेक भागांत सकाळच्या सत्रात धुक्‍याची चादर पसरलेली पाहायला मिळत असून, हवेतल्या गारव्यामुळे वातावरण आल्हाददायक झालं आहे. पारा 22 अंशापर्यंत खाली गेला आहे. 

जिल्ह्यात आतापर्यंत 4989.40 मिलिमीटर एवढ्या पावसाची नोंद झाली आहे. यंदा सप्टेंबरपर्यंत जिल्ह्यात समाधानकारक पाऊस झाला होता. त्यामुळे भातशेतीचेही चित्र चांगले होते; मात्र मॉन्सूनच्या भारतातील आगमनापूर्वी निसर्ग वादळाने दिलेला तडाखा आणि त्यानंतर परतीच्या पावसाने जिल्ह्यात पूरस्थिती आणली. यात भातशेतीची प्रचंड हानी झाली. त्यामुळे कधी एकदा पाऊस निघून जातो, अशा मानसिकता जिल्हावासीयांची होती. 
जिल्ह्यात 28 ऑक्‍टोबरपासून मॉन्सूनने एक्‍झिट घेतली आणि आकाश मोकळे झाले आहे. सध्या जिल्ह्याच्या सर्वच भागांत सकाळच्या सत्रात सर्वत्र धुकं पसरलेलं पाहायला मिळत आहे. डोंगर भागात धुक्‍याचे प्रमाण अधिक आहे. मुंबई गोवा महामार्गावर धुकं असल्याने सकाळी वाहनांना दिवे लावून प्रवास करावा लागत होता. 

सिंधुदुर्गमधील तापमानही 22 ते 30 अंश सेल्सिअस इतकं खाली उतरत असल्याचे पाहायला मिळत आहे. गेले चार थंडी आणि धुकं असल्याने कोकणातला निसर्गाचं रुपडे पालटलं आहे. या पालटलेल्या निसर्ग डोळ्यांत साठवण्यासाठी अनेकांचे पाय कोकणाकडे वळावेत, अशी अपेक्षा पर्यटन व्यावसायिकांतून व्यक्‍त होत आहे. कारण कोरोनामुळे गेले आठ महिने जिल्ह्याचा पर्यटन व्यवसाय ठप्प झाला आहे. 

आंबा व काजू पिकांना होणार फायदा
गेली दोन वर्षे मॉन्सूनचे उशिरा आगमन आणि तेवढाच परतीच्या पावसाला होत असलेला उशीर पाहता थंडीचा कालावधी पंधरा ते वीस दिवसांनी पुढे ढकलला जायचा. याचा परिणाम जिल्ह्यातील आंबा, काजू यासारख्या फलोत्पादनवर होत असे; मात्र यंदा नोव्हेंबरच्या पहिल्याच आठवड्यात योग्यवेळी थंडीची चाहूल लागल्याने याचा फायदा आंबा व काजू पिकांना होणार असल्याची शक्‍यता वर्तविण्यात येत आहे. त्यामुळे बागायतदार समाधानी आहे.

 संपादन : विजय वेदपाठक