मंडणगड /दापोली (रत्नागिरी) : वेळास, आंजर्ले येथील कासव महोत्सवावर कोरोनाचे संकट उभे ठाकले आहे. जगभरातून येणारे पर्यटक लक्षात घेत वेळास ग्रामसभेने हा महोत्सव रद्द करण्याचा निर्णय घेतला आहे. आंजर्ले महोत्सवाबाबत एका बैठकीत स्थगितीचा निर्णय घेण्यात आला.

या संदर्भात वेळास येथे आज ग्रामसभेचे आयोजनही करण्यात आले होते. त्यानंतर सरपंच प्रल्हाद तोडणकर यांनी आरोग्य सुरक्षेच्या कारणास्तव कासव महोत्सव रद्द केल्याचे पत्रकारांना सांगितले. समुद्रात पिल्ले सोडण्याची प्रक्रिया हंगाम संपेपर्यंत चालू राहणार आहे. यंदाचे कासव विणीच्या हंगामात वेळास किनारी १९ घरट्यांत २१३९ कासवाचे पिल्लांची अंडी तर एक घरटे नैसर्गिक पद्धतीने संरक्षित करण्यात आले. त्यामुळे यंदाच्या हंगामात अधिक पिल्ले बाहेर पडण्याची शक्‍यता आहे.

हेही वाचा- रत्नागिरीत २२ लाखांच्या खुर्ची घोटाळ्याचा पर्दाफाश...

पर्यटक हंगामावर परीनाम  

घरटी संरक्षित करण्याचा काळ व विणीचा हंगाम याचे गणित मांडून आयोजक व वनविभागाने ३ मार्चपासून कासव महोत्सव सुरु होणार असल्याचे विविध माध्यमांतून जाहीर करण्यात आले. पहिल्या दोन दिवशी मोठया संख्येने पिल्ले बाहेर न पडल्याने पर्यटकांची निराशा झाली. मुंबई पुणे ही दोन शहरे आरोग्यांचे दृष्टीने सध्या हाय अर्लटवर आहेत. वेळास येथे येणारे पर्यटक हे पुणे मुंबईतून येत असतात. कोरोनाच्या पार्श्वभूमीवर निर्माण झालेली परिस्थिती आणखी काही दिवस अशीच कायम राहिल्यास पर्यटक हंगाम फूलण्याची शक्‍यता धूसर आहे.

हेही वाचा- मुंबईच्या या चिमुकलीचा शिमगोत्सव ठरला अखेरचाच.... ​
कोरोना व्हायरसची पार्श्‍वभूमी
आंजर्ले येथे १४ मार्च ते ३१ मार्च या कालावधीत आयोजित करण्यात आलेला कासव महोत्सवही स्थगित करण्यात आला आहे. आंजर्ले समुद्रकिनारी ७ घरट्यात ७६९ कासवांची अंडी संरक्षित करण्यात आली आहेत. कोरोना व्हायरसच्या पार्श्‍वभूमीवर कासव महोत्सवासाठी येणाऱ्या पर्यटकांकडून कोणताही धोका उत्पन्न होऊ नये, यासाठी वनविभाग, कांदळवन कक्ष व सह्याद्री निसर्ग मित्र मंडळ यांच्याशी चर्चा करून हा कासव महोत्सव स्थगित केल्याची माहिती कासवमित्र तृषांत भाटकर यांनी दिली.