ओरोस (सिंधुदुर्ग) - जिल्ह्यात आणखी एका व्यक्तीचा कोरोना अहवाल पॉझिटिव्ह आला. त्यामुळे बाधितांची संख्या 243 असून, सध्या सक्रिय 65 रुग्ण आहेत. जिल्ह्यातील आणखी सहा रुग्णांनी कोरोनावर मात केली. आज त्यांना घरी सोडण्यात आले. त्यामुळे जिल्ह्यात आतापर्यंत डिस्चार्ज मिळालेल्या रुग्णांची संख्या 172 झाली आहे. 

काल (ता. 4) उशिरा नव्याने सात बाधित सापडले होते. यात कणकवली तालुक्‍यातील पाच, तर मालवण तालुक्‍यातील दोन रुग्णांचा समावेश आहे. कणकवली तालुक्‍यातील खारेपाटण येथील दोन, तर जानवली येथील तीन रुग्ण आहेत. मालवण तालुक्‍यातील आचरा येथील दोन रुग्ण आहेत. या सर्व नवीन रुग्णांना जिल्हा रुग्णालयात दाखल करण्यात आले आहे. काल सात रुग्ण व आज सायंकाळी आणखी एक रुग्ण मिळाल्याने जिल्ह्यातील बाधित संख्या 235 वरून 243 झाली आहे. सक्रिय असलेल्या 63 संख्येत आठने वाढ होत ती 71 झाली होती; मात्र आज नव्याने सहा व्यक्तींना डिस्चार्ज दिल्याने पुन्हा सक्रिय संख्या 65 झाली आहे. 

जिल्हा कोरोना केंद्रात नव्याने 42 अहवाल प्राप्त झाले आहेत. त्यामुळे जिल्ह्यात तपासणीसाठी घेतलेल्या अहवालांची संख्या चार हजार 117 वर पोचली. यातील चार हजार 65 अहवाल प्राप्त झाले आहेत. प्राप्त अहवालातील 243 बाधित आले; तर तीन हजार 823 निगेटिव्ह आले आहेत. बाधित 243 पैकी 172 बरे होऊन घरी परतले. पाच व्यक्ती मृत झाल्या आहेत. एक मुंबई येथे उपचाराला गेला. त्यामुळे जिल्ह्यात सध्या 65 रुग्ण सक्रिय राहिले आहेत. 

जिल्ह्यातील आयसोलेशन कक्षात सध्या 104 व्यक्ती उपचार घेत आहेत. डेडिकेटेड कोविड रुग्णालय असलेल्या जिल्हा रुग्णालयात सध्या 33 बाधित, तर 38 संशयित उपचार घेत आहेत. डेडिकेटेड कोविड हेल्थ सेंटरमध्ये 19 बाधित आणि दोन संशयित उपचार घेत आहेत; तर कोविड केअर सेंटरमध्ये 13 कोरोनाबाधित उपचार घेत आहेत. जिल्ह्याच्या आरोग्य पथकाने आज एक हजार 824 व्यक्तींची आरोग्य तपासणी केली. यात कोणालाही कोरोनाची लक्षणे आढळली नसल्याचे जिल्हा शल्य चिकित्सक डॉ. धनंजय चाकूरकर यांनी सांगितले. 

जिल्ह्यातील संस्थात्मक क्वारंटाईनमध्ये दाखल असलेल्या 916 व्यक्तींचा कालावधी पूर्ण झाल्याने येथे 15 हजार 491 व्यक्ती शिल्लक राहिल्या आहेत. शासकीय संस्थात्मक क्वारंटाईनमध्ये कालच्या एवढीच 32 संख्या आहे. गावपातळीवरील क्वारंटाइनमध्ये दाखल असलेल्या 952 व्यक्ती आज घरी परतल्या. त्यामुळे येथे 12 हजार 978 व्यक्ती शिल्लक राहिल्या आहेत. नागरी क्षेत्रातील क्वारंटाईनमध्ये मात्र 33 व्यक्तींची भर पडली. त्यामुळे येथील संख्या दोन हजार 481 झाली आहे. 
 

दोन नवीन कंटेन्मेंट झोन 
तिर्लोट (ता. देवगड) येथील रामचंद्र बाळकृष्ण धालवलकर यांच्या घराचा परिसर कंटेन्मेंट झोन जाहीर केला आहे. ओझरम तळीवाडी (ता. कणकवली) येथील एक किलोमीटरपर्यंत सर्व परिसर कंटेन्मेंट झोन म्हणून जाहीर केला आहे. कणकवली उपविभागीय अधिकारी यांनी हे आदेश काढले असून, 17 जुलै रात्री 12 पर्यंत हे आदेश लागू राहणार आहेत. या कालावधीत सर्व आस्थापना, दुकाने, वस्तुविक्री बंद राहील. तसेच, या क्षेत्रात नागरिकांना येणे- जाणे व सर्व प्रकारच्या वाहनांना प्रवेश बंद असेल. हे आदेश अत्यावश्‍यक सेवा, सार्वजनिक वितरण व्यवस्था, वैद्यकीय उपचार व्यवस्था, बॅंक, सेवा देणारे अधिकारी, कर्मचारी व त्यांची वाहने यांना लागू राहणार नाही. या आदेशाचे उल्लंघन करणाऱ्यांविरुद्ध कारवाई केली जाईल, असे आदेश कणकवली उपविभागीय अधिकारी यांनी दिले आहेत.