ओरोस (सिंधुदुर्ग) -  कोरोना तपासणीसाठी जिल्ह्यातील सहा व्यक्तींचे नमुने आज नव्याने पुणे येथे पाठविण्यात आले आहेत. त्या अहवालांची जिल्हा प्रशासनाला प्रतीक्षा आहे. आतापर्यंत जिल्ह्यातून 62 नमुने पाठविले असून त्यातील केवळ एकच पॉझिटिव्ह आला. तर सहा नमुन्यांचे अहवाल येणे बाकी आहे. आज आयसोलेशनमध्ये नव्याने एक रुग्ण दाखल झाला असून एकूण 21 रुग्ण उपचार घेत आहेत. 

कोरोनाच्या पार्श्‍वभूमीवर जिल्ह्यात सध्या 375 व्यक्तींचे घरीच अलगीकरण करण्यात आले आहे. शासकीय आरोग्य संस्थेत 51 व्यक्तींचे अलगीकरण करण्यात आले आहे. आरोग्य यंत्रणेने दिवसभरात 1990 व्यक्तींची आरोग्य तपासणी केली तर पोलिसांनी 250 व्यक्तींची तपासणी केली आहे. 

कोरोना विषाणूच्या पार्श्‍वभूमीवर धर्मामध्ये, जातीय तेढ निर्माण होईल असे कोणतेही संदेश, फोटो अगर व्हिडिओ व्हॉट्‌सऍप, फेसबुक, ट्‌वीटर, टिकटॉक, इन्स्टाग्राम अशा सोशल मीडियाच्या माध्यमातून प्रसारित केल्यास संबंधित व्यक्तीवर तसेच ग्रुप ऍडमिनवर कायदेशीर कारवाई करण्यात येईल. सर्व सोशल मीडिया पोस्टवरील संदेशांवर पोलिस विभागाचे लक्ष असून कोणताही आक्षेपार्ह मजकूर प्रसारित करू नये, अशा सूचना जिल्हा पोलिस अधीक्षक यांनी दिल्या आहेत. जिल्ह्यात संचारबंदी असतानाही विनाकारण दुचाकीवरून फिरणाऱ्यांवर 10 गुन्हे दाखल करण्यात आले असून 17 वाहने जप्त करण्यात आली. 

"त्या' रुग्णासोबत प्रवास करणाऱ्यांचा शोध 
रत्नागिरी येथे आढळून आलेल्या कोरोना पॉझिटिव्ह रुग्णासोबत रेल्वेतून प्रवास केलेल्या जिल्ह्यातील नागरिकांचा तपास करण्यात जिल्हा प्रशासनाला यश आले आहे. रत्नागिरी येथे आढळून आलेल्या दुसऱ्या कोरोना पॉझिटिव्ह रुग्णासोबत रेल्वेच्या डब्यातून प्रवास केलेल्या जिल्ह्यातील व्यक्तींचा शोध घेण्यात आला असून त्यांना जिल्हा सामान्य रुग्णालयातील विलगीकरण कक्षामध्ये दाखल करण्यात आले आहे. त्यांचा स्वॅब घेऊन तपासणीसाठी पाठविण्यात आला आहे.