रत्नागिरी: रत्नागिरी शहराध्ये एका अनोख्या चोरीची जोरदार चर्चा सुरू आहे. लाखोची रोकड, दागिने अशा मौल्यवान वस्तूंची ही चोरी नाही, तर ही चोरी आहे खेकड्यांची. आश्चर्य चकीत झालात ना, पण हे खरे आहे. चेन्नईच्या वरिष्ठ संशोधन फिलो केंद्रीय निमखारे मत्स्य संवर्धन संस्थेअंतर्गत असलेल्या परटवणे येथील युनिटमध्ये ही चोरी झाली. अज्ञात चोरट्याने पुर्ण तयार झालेले १२ हजार किमतीचे ३०० ते ५०० ग्रॅम वजनाचे १५ किलो खेकडे लांबविले आहेत.

आखाडीच्या पार्श्वभूमीवर खवय्यांनी या खेकडा संवर्धन केंद्रावर डल्ला मारल्याची चर्चा आहे. शहर पोलिस ठाण्यासह शहरात या चोरीची जोरदार चर्चा सुरू आहे. शहरातील परटवणे येथे चेन्नईच्या वरिष्ठ संशोधन फिलो केंद्रीय निमखारे मत्स्य संवर्धन संस्थेअंतर्गत खेकडा संवर्धन केंद्र आहे. या तलावातून २५ ते २६ जुलै दरम्यान अज्ञात इसमाने या खेकड्यांची चोरी केल्याचा संशय आहे. खेकडे पुर्ण तयार झाले असून ३०० ते ५०० ग्रॅम वजनाचे होते. एकूण १५ किलो खेकडे अज्ञातांनी लांबविले आहेत. तशी तक्रार केंद्राचे व्यवस्थापक श्वेता पाटील यांनी शहर पोलिस ठाण्यात ही तक्रार दिली आहे.

बॉक्समध्ये ठेवण्यात येणाऱ्या खेकड्यांना रोज खाद्य घालण्यात येते. तेव्हा हा प्रकार लक्षात आला. माहितगाराने ही चोरी केल्याची चर्चा आहे. या अजब चोरीमध्ये तब्बल १२ हजार रुपये किंमती खेकडे गेल्याचे तक्रारीत म्हटले आहे. येत्या रविवारपासून श्रावण महिना सुरू होत आहे. त्यामुळे आखाडी साजरी करण्यासाठी बुधवार, शुक्रवार आणि रविवार हे तीन दिवस असल्याने माहितीगार खवय्यांनी ही चोरी केल्याचा पोलिसांचा संशय आहे.