चिपळूण (रत्नागिरी) : दुसरी मुलगी झाली, म्हणून आईनेच स्वतःच्या मुलीला बुडवून ठार मारल्याची घटना वहाळ येथे उघडकीस आल्यानंतर संपूर्ण तालुक्‍यात खळबळ उडाली आहे. या घटनेने पोलिसही चक्रावले आहेत. आई स्वतःच्या पोटच्या गोळ्याला अशा पद्धतीने कशी काय मारू शकते? आईच्या या सैतानी कृत्याने पोलिसदेखील बुचकळ्यात पडले आहेत. त्यामुळे पोलिसांनी तपासाला वेग दिला असून संपूर्ण खापले कुटुंब आणि आजूबाजूच्या लोकांची चौकशी करण्यास सुरवात केली आहे.

तालुक्‍यातील वहाळ घडशीवाडी येथे एक महिन्याची शौर्या प्रवीण खापले या बालिकेचा घरातील बाथरूममध्ये पाण्याच्या बादलीत बुडून मृत्यू झाल्याचे प्रथमदर्शनी समोर आले; परंतु डीवायएसपी सचिन बारी यांनी सूत्रे हाती घेऊन तपासाला वेग दिला आणि सत्य समोर आले. सुरवातीला कोणीतरी पाण्याच्या बादलीत शौर्याला आणून टाकले, असा कांगावा करणाऱ्या शिल्पा प्रवीण खापरे हिने पोलिसांच्या समोर सत्य सांगायला सुरवात केली आणि दुसरी मुलगी झाली, म्हणून मीच तिला पाण्याच्या बादलीत बुडवून ठार मारले, अशी कबुली आई शिल्पा हिने पोलिसांना दिली. पोलिसांनी खुनाचा गुन्हा दाखल करून शिल्पा खापरे हिला अटक केली. १२ मार्चपर्यंत तिला पोलिस कोठडी मिळाली आहे.

हेही वाचा - रत्नागिरी मेडिकल कॉलेज ही काळ्या दगडावरची रेघ -

वहाळ परिसरात सुरू असलेल्या चर्चेचा कानोसा घेता, प्रत्यक्षात शौर्या हिचे काही दिवसांपूर्वीच बारसे झाले होते. अत्यंत धुमधडाक्‍यात वडील प्रवीण याने बारसे करून शौर्या हे नाव दिले होते. परंतु शौर्याला कावीळचा आजार झाला होता. तिला सावर्डे येथील खासगी रुग्णालयात दाखल केले होते. तिच्या उपचाराला हजारो रुपये खर्च करून वडील प्रवीण याने घरी आणले होते. ती पूर्ण बरी व्हावी आणि नंतरच आपण नोकरीला जावे, हा उद्देश ठेवून प्रवीण खापले यांनी आपली रजादेखील पाच दिवस पुढे वाढवली होती. त्यामुळे वडिलांनी तिला पूर्णपणे स्वीकारले होते, हे पोलिस तपासात पुढे आले आहे. मग असे का घडले, या प्रश्नाने पोलिसांना देखील बुचकळ्यात टाकले आहे.

घडशीवाडीतील काहींना पाचारण

सोमवारी (८) वहाळ घडशीवाडी येथील काही लोकांना बोलावून डीवायएसपी कार्यालयात त्यांची चौकशी करण्यात आली. आई शिल्पा एकटीच नव्हे तर तिच्यामागे कोणीतरी असले पाहिजे, असा पोलिसांचा संशय आहे. सावर्डे पोलिस ठाण्याचे पोलिस निरीक्षक भरत धुमाळ स्वतः या प्रकरणात तपास करत आहेत.