लांजा (रत्नागिरी) : आपल्या मालकीच्या जागेतील घरदुरुस्तीचे काम करणाऱ्या डॉक्‍टरांना तुम्ही माझ्या जागेत आला आहात, असा दावा करून शिवीगाळ आणि घरात घुसून मारहाण केल्याचा प्रकार उघड झाला आहे. त्यांच्या कुटुंबीयांना ठार करण्याची धमकीही दिल्याची घटना प्रभानवल्ली-गुरववाडी येथे घडली. या प्रकरणी लांजा पोलिसांनी प्रभानवल्ली येथील एका तरुणावर गुन्हा दाखल केला आहे. 

याबाबत लांजा पोलिसांनी दिलेल्या माहितीनुसार प्रभानवल्ली गुरववाडी येथे विश्राम कृष्णा गावखडकर (वय ५२) हे गेली १३ वर्षे वैद्यकीय व्यवसाय करीत आहेत. प्रभानवल्ली गणेशखोरे येथील अब्बास उस्मान नाईक व त्यांचे बंधू यांची प्रभानवल्ली गुरववाडी येथील सार्वजनिक १५ गुंठे जमिनीपैकी अब्बास नाईक यांच्या वाट्याला आलेली साडेपाच गुंठे जागा डॉ. विश्राम गावखडकर यांनी खरेदीखत करून रितसर विकत घेतली होती. या जागेमध्ये त्यांनी घर बांधले होते.

हेही वाचा - ‘व्हॅलेंटाइन डे’ला करा सायकलवरच प्रेम; दापोलीकरांची साद

विश्राम गावखडकर यांनी महिनाभरापासून घराच्या दुरुस्तीचे काम हाती घेतले होते. दुरुस्तीचे काम करत असताना महिनाभरापूर्वी प्रभानवल्ली गणेशखोरे येथील अब्बास यांचा पुतण्या मोहसिन कासम नाईक यांनी घराच्या ठिकाणी जाऊन डॉक्‍टर यांना तुम्हाला दिलेल्या जागेपेक्षा अधिक आमच्या जागेत आला आहात. तुम्ही घर चुकीच्या पद्धतीने बांधत आहात, असे म्हटले. त्यावरून त्यांच्यात वाद झाला होता. महिनाभरापूर्वी झालेल्या वादाचा राग मोहसिन यांच्या मनामध्ये धगधगत होता.

यातूनच मंगळवारी रात्री ११ वाजता मोहसिन याने डॉ. विश्राम गावखडकर यांच्या घराच्या अंगणात येऊन शिवीगाळ केली. त्यानंतर कडी तोडून घरात घुसून डॉ. विश्राम, त्यांची पत्नी विद्या, मुलगा आकेश यांना मारहाण केली. या झटापटीत विद्या यांच्या गळ्यातील मंगळसूत्र तुटले. मारहाणीत या कुटुंबीयांना दुखापत झाली. मोहसिन घरातून बाहेर पडल्यानंतर त्याने अंगणात उभी असलेली दुचाकीही ढकलून दिली. या प्रकरणी डॉ. विश्राम गावखडकर यांनी बुधवारी (ता. १०) सायंकाळी लांजा पोलिसात फिर्याद दाखल केली.

हेही वाचा - Good News : बारावी परीक्षेचे अंतिम वेळापत्रक जाहीर

संपादन - स्नेहल कदम