सावंतवाडी (सिंधुदुर्ग) : आरोंदा-खासकिलवाडी येथील लाकूड गिरणीलगत असलेल्या दिगंबर जोशी यांच्या घराच्या गॅलरीत सकाळी चक्क 5 फूटी मगर आढळून आली. वनविभागाने तिला ताब्यात घेत नैसर्गिक अधिवासात सोडले. नदी, तलाव ओहळात आढळून येणाऱ्या मगरी आता आपला नैसर्गिक अधिवास सोडून नागरी वस्तीत घुसू लागल्या आहेत. अलीकडे या घटनांमध्ये वाढ होत आहे. 

बऱ्याच वेळा मगरींकडून पाळीव जनावरांवर हल्ला होण्याच्या घटना घडल्या आहेत. अलिकडे मात्र बऱ्याच मगरी नागरी वस्तीत घुसलेल्या बातम्या पुढे येत आहेत. आरोंदा भागातही मोठ्या प्रमाणात मगरींचा वावर वाढला आहे. आज सकाळी आरोंदा खासकिलवाडी येथील लाकूड गिरणीलगत असलेल्या जोशी यांच्या घराच्या गॅलरीत सकाळी चक्क 5 फूटी मगर दिसून आली.

हेही वाचा - सावंतवाडी ; तळवडेतील बेपत्ताचा मृतदेह नेमळेत आढळला

त्यांनी याबाबतची कल्पना शेजाऱ्यांना दिल्यानंतर तेथील भाजपचे आरोंदा विभागीय अध्यक्ष आबा सातोस्कर यांनी वनविभागाला याबाबत कळवले. त्यानंतर आजगाव वनपाल चंद्रसेन धुरी, नेमळे वनरक्षक रमेश पाटील, वनसेवक बबन रेडकर, चालक जंगले आदींनी घटनास्थळी धाव घेतली. त्यानंतर या मगरीला जेरबंद करीत तिला नैसर्गिक अधिवासात सोडले. 

संपादन - स्नेहल कदम