चिपळूण : रत्नागिरी जिल्ह्यातील नद्यामधील गाळ काढण्याचे काम अलोरेतील यांत्रिकी विभाग करत आहे. या विभागाकडे पुरेसे अभियंते नाहीत. कोयनेतून कामगिरीवर आणलेल्या एका सहायक अभियंत्यावर संपूर्ण जिल्ह्याची जबाबदारी सोपवली आहे. त्याने कुठे कुठे लक्ष द्यावे, असा प्रश्न आहे. वाशिष्ठी नदीतील गाळ काढण्याच्या कामात डिझेलचा भ्रष्टाचार सुरू असल्याची ओरड होत आहे. या पार्श्वभूमीवर चौकशी दरम्यान यांत्रिकी विभागाची अशी अपंगता समोर आली.

वाशिष्ठी नदीतील गाळ काढण्याचे काम यांत्रिकी विभागाकडून सुरू आहे. या कामात नेमलेल्या कर्मचाऱ्यांकडून डिझेलमध्ये भ्रष्टाचार करण्यात आला. काही कर्मचाऱ्यांनी डिझेल परस्पर विकले. ही बाब समोर आल्यानंतर चौकशी सुरू झाली. त्यानंतर यांत्रिकी विभागाने तीन कंत्राटी कामगारांना निलंबित केले. डिझेल विकणारे कंत्राटी कामगार होते. त्यांच्यावर लक्ष ठेवण्यासाठी पुरेसे अभियंते नाहीत. त्यामुळे ही परिस्थिती निर्माण झाल्याचे यांत्रिकी विभागाकडून सांगितले जात आहे.

परिस्थितीचा घेतात गैरफायदा

यांत्रिकी विभागात शाखा अभियंता पदाची १९ पदे मंजूर आहेत. यातील १७ पदे रिक्त आहेत. दोन शाखा अभियंत्यांपैकी एकाकडे कोळकेवाडी धरण आणि दुसऱ्याकडे कार्यालयीन कामकाजाची जबाबदारी आहे. गाळ काढण्याचे काम पाहण्यासाठी तिसरा अभियंता नाही. त्यामुळे कोयना नगर येथील शाखा अभियंत्याची अलोरे येथे कामगिरीवर नियुक्ती केली आहे. त्याला कोयनेसह रत्नागिरी जिल्ह्यातील गाळ काढण्याच्या कामावर लक्ष ठेवावे लागत आहे. एकच अभियंता जिल्ह्याचा कारभार सांभाळत आहे. त्याला सर्व ठिकाणी लक्ष ठेवता येत नाही. या परिस्थितीचा गैरफायदा घेत चालक डिझेलची चोरी करत असल्याचे समोर आले आहे.

त्यामुळे अशा कर्मचाऱ्यांचे फावते

अलोरे येथील यांत्रिकी विभागाकडे वाशिष्ठी नदीसह खेड, रत्नागिरी, राजापूर, संगमेश्वर, देवरूख येथील नद्यामधील गाळ काढण्याचे काम सोपवण्यात आले आहे. शासनाकडून इंधन खर्च मंजूर होतो.