राजापूर (रत्नागिरी) : गेल्या काही वर्षांपासून महसूल विभागातर्फे हाती घेतलेले सातबारा उतारा संगणकीकरण करण्याचे तालुक्‍यातील सुमारे ९९ टक्के काम पूर्ण झाले असून येत्या काही दिवसांमध्ये शंभर टक्के काम पूर्ण होईल. त्यामुळे शेतकऱ्यांसह तालुकावासीयांना आता लवकरच ऑनलाईन पद्धतीने डिजिटल स्वाक्षरीचे सातबारा कुठेही उपलब्ध होणार आहेत.

जमिनीचा मालकी हक्क दर्शविणारा पुरावा म्हणून सातबारा उताऱ्याला महत्त्व आहे. अनेक वेळा तलाठ्यांशी न होणारा संपर्क, वारंवार डाऊन असलेला सर्व्हर आदी विविध कारणांमुळे सातबारा उताऱ्यासाठी शेतकऱ्यांना तलाठी कार्यालयामध्ये वारंवार खेटे मारावे लागतात. लोकांची होणारी ही गैरसोय लक्षात घेऊन शासनाने २०१३ पासून महसूल व वन विभाग अधिकारी अभिलेखातील नोंदी व त्यांच्या कार्यपद्धतीचे संगणकीकरण ई-फेरफार कार्यक्रम संपूर्ण राज्यात हाती घेतला आहे.

हेही वाचा - येवा कोकण आपलाच असा ; निळ्याशार समुद्र पर्यटकांना घालतोय साद -

त्यानुसार शेतकऱ्यांच्या जमिनीचा सातबारा ऑनलाईन करण्याचे काम हाती घेण्यात आले. त्यानंतरही अनेक ऑनलाईन सातबारामध्ये अनेक त्रुटी राहिल्याने जमीनमालकांना असे चुकीचे सातबारे अडचणीचे ठरू लागले. त्यामुळे सातबारा ऑनलाईन 
प्रक्रियेत झालेल्या चुका सुधारण्यासाठी पुन्हा नव्याने सातबारा ऑनलाईनचे काम हाती घेण्यात आले. 

मंडल अधिकाऱ्यांसह तलाठ्यांच्या मोठ्या संख्येने रिक्त असलेल्या जागा असताना प्रांताधिकारी प्रवीण खाडे, तहसीलदार प्रतिभा वराळे यांच्या मार्गदर्शनाखाली मंडल अधिकारी, तलाठी आदींनी सातबारा उतारा ऑनलाईन करण्यासाठी विशेष मेहनत घेतली. 

एक टक्का काम आठवड्यात पूर्ण होणार

दरम्यान, उर्वरित केवळ एक टक्का काम शिल्लक असून ते सातबारा उताऱ्यावरील तांत्रिक अडचणींमुळे रखडले असून येत्या आठवडाभरामध्ये पूर्ण होईल, अशी माहिती प्रशासनाकडून देण्यात आली.

दृष्टिक्षेपात राजापूर

•  तालुक्‍यात २३७ महसुली गावे, १२ मंडळे
•  तुलनेमध्ये कर्मचारी संख्या अजूनही अपुरी 
•  सातबारा ऑनलाईनच्या कामावेळी तारेवरची कसरत 
•  ३ लाख १५ हजार ५२५ सातबारा उतारे
•  एकूण उताऱ्यांपैकी ऑनलाईनचे ९९ टक्के काम पूर्ण 

हेही वाचा -  सावधान! तुम्हालाही २५ लाखाच्या लॉटरीचा मेसेज येतोय का ? -

संपादन - स्नेहल कदम