रत्नागिरी : डॉ. बाबासाहेब आंबेडकर (Dr. Babasaheb Ambedkar) यांच्या मुळे मी राज्याच्या उद्योगमंत्री पदावर आहे. त्यामुळे संविधान (Constitution) बदलण्याचे कोणी धाडस जरी केले तर राजकीय संन्यास घेऊन तुमच्यासोबत असेन, असे प्रतिपादन पालकमंत्री उदय सामंत (Uday Samant) यांनी रत्नागिरीत केले.

रत्नागिरी येथील डॉ. बाबासाहेब आंबेडकर स्मारक समितीच्यावतीने आयोजित १३३ वा जयंती महोत्सवप्रसंगी ते बोलत होते. या वेळी पालकमंत्री सामंत यांनी डॉ. बाबासाहेब आंबेडकर यांच्या पुतळ्याला पुष्पहार अर्पण करून अभिवादन केले.

या प्रसंगी ते म्हणाले, काही लोक निवडणुकीच्या पार्श्वभूमीवर डॉ. बाबासाहेब आंबेडकर यांनी लिहिलेल्या संविधानाबद्दल अपप्रचार करत संविधान बदलणार असल्याची अफवा पसरवत आहेत. मात्र संविधान बदलण्याचे कोणी धाडस जरी केले तर तुमचा उदय सामंत राजकीय संन्यास घेऊन तुमच्या सोबत राहील.

डॉ. बाबासाहेब आंबेडकर यांच्यामुळे राज्याच्या उद्योगमंत्री आणि रत्नागिरीच्या पालकमंत्री पदावर पोचलो आहे. मंडणगड तालुक्यातील आंबडवे येथे गेल्या वर्षीपासून शासकीय जयंती साजरी करण्यास सुरवात केली असून कायमस्वरूपी ही शासकीय जयंती सुरु राहणार आहे.

तसेच डॉ. बाबासाहेब आंबेडकर यांना आदरांजली वाहण्यासाठी १८ एप्रिलला प्रमोद महाजन क्रीडागणावर मोठा कार्यक्रम आयोजित करण्यात आला. कार्यक्रमाला शिवसेना जिल्हाध्यक्ष राहुल पंडित, बाबू म्हाप, राजन शेट्ये, एल. बी. पवार, संतोष कदम, कुमार शेट्ये, हारीस शेकासन, रफिक बिजापुरी, दीपक जाधव, बी. के. कांबळे आदी उपस्थित होते.