चिपळूण (रत्नागिरी) : तालुक्‍यातील सर्वाधिक श्रीमंत ग्रामपंचायत असलेल्या खेर्डी ग्रामपंचायतीची निवडणूक बिनविरोध होण्यासाठी प्रयत्न सुरू आहेत. या पार्श्वभूमीवर खेर्डीतील दोन गटाची माजी आमदार रमेश कदम यांच्या निवासस्थानी काल बैठक झाली. कोणताही अंतिम निर्णय झाला नाही. राष्ट्रवादीचे तालुकाध्यक्ष जयंद्रथ खताते यांनी कार्यकर्त्यांशी दोन दिवसांत चर्चा करून निर्णय सांगू, असे सांगितले आहे.

अनेक उमेदवारांनी वर्षभरापासून निवडणूकीसाठी मोर्चेबांधणी करीत खर्च केला आहे. त्यामुळे बिनविरोधची शक्‍यता कमी असल्याची चर्चा खेर्डीत सुरू आहे. खेर्डी ग्रामपंचायतीची निवडणूक म्हणजे एकप्रकारे रणसंग्रामच असतो. या ठिकाणी दोन गट आमने- सामने येतात. यामुळे येथील निवडणूक चुरशीची होते. अनेक वर्षे एकत्र असलेले आता आमने- सामने आल्याचे चित्र आहे.

हेही वाचा - रत्नागिरीत शाळांची घंटा सोमवारपासून वाजणार ? -

अशातच बिनविरोध निवडणुकीचा प्रस्ताव समोर आला आहे. या पार्श्वभूमीवर आमदार शेखर निकम यांनी दिलेल्या सूचनेनुसार राष्ट्रवादीतील दोन गटाची बैठक माजी आमदार रमेश कदम यांच्या निवासस्थानी बैठक झाली. यावेळी आमदार निकम यांच्यासह माजी आमदार रमेश कदम, दादा साळवी, शौकत मुकादम, सुचय रेडीज, पंचायत समिती सदस्य नितीन ठसाळे, खेर्डीचे माजी सरपंच व विद्यमान सदस्य दशरथ दाभोळकर आदी पदाधिकारी व कार्यकर्ते उपस्थित होते. 

खेर्डीतील जयंद्रथ खताते गटाकडून सुकाई परिवर्तन पॅनल तर माजी जिल्हा परिषद सदस्य अनिल दाभोळकर यांच्याकडून गाव पॅनलची तयारी केली जात आहे. त्यासाठी काही उमेदवारही निश्‍चित झाले आहेत. त्यामुळे आता अर्ज दाखल करण्यासाठी २३ ते ३० डिसेंबरपर्यंत मुदत असल्याने त्याआधी कोणता निर्णय होतो, याकडे सर्वांचे लक्ष वेधले गेले आहे. 

दुमत नाही...मात्र, कार्यकर्त्यांशी चर्चा करणार

बैठकीत नेत्यांनी ग्रामपंचायत निवडणुकीत महाविकास आघाडी म्हणून निवडणूक लढविताना जेथे शक्‍य, तिथे बिनविरोध निवडणूक होण्याच्या दृष्टीने प्रयत्न होणे आवश्‍यक आहे. यानुसार खेर्डी ग्रामपंचायत निवडणूक बिनविरोध व्हावी, अशी अपेक्षा व्यक्त केली. मात्र, राष्ट्रवादी काँग्रेसचे तालुकाध्यक्ष जयद्रथ खताते यांनी खेर्डी ग्रामपंचायतीची निवडणूक बिनविरोध होण्यास आपले दुमत असण्याचे कारण नाही. मात्र, या संदर्भात कार्यकर्त्यांशी चर्चा करूनच निर्णय घेतला जाईल, अशी भूमिका स्पष्ट केली.

हेही वाचा -  १०८ नंबरची रुग्णवाहिकाच आहे आजारी ; ड्रायव्हर असूनही सेवा मात्र ठप्प -

कार्यकर्ते मान्यता देतील ?

काँग्रेसचे तालुकाध्यक्ष प्रशांत यादव यांनी आपली भूमिका स्पष्ट करताना सांगितले की, खेर्डी ग्रामपंचायतीची निवडणूक बिनविरोध होण्यासाठी या अगोदर वरिष्ठांनी प्रयत्न करायला पाहिजे होते. आता उशीर झाला आहे. तसेच ही निवडणूक बिनविरोध व्हावी, यासंदर्भात कार्यकर्ते मान्यता देतील, अशी शक्‍यता वाटत नाही.

संपादन - स्नेहल कदम