कुडाळ (सिंधुदुर्ग) - "कुणी घर देता का हो घर', म्हणत केरवडे तर्फ माणगाव येथील राघोजी घाडी यांनी न्याय मिळेपर्यंत तुटपुंजा संसार घेऊन उपोषणाचा आधार घेत वृद्ध आईसोबत केरवडे तर्फ माणगाव ग्रामपंचायतीच्या वरांड्यात एक दिवसाचा संसार थाटला. सरपंच यांनी दिलेल्या आश्‍वासनामुळे त्यांनी तात्पुरते उपोषण मागे घेतले. 

एप्रिलमध्ये शेजारी विहीर खोदाई करताना ब्लास्टींग केल्याने राघोजी घाडी यांच्या राहत्या घराच्या भिंतींना पूर्णतः तडे गेले होते. याची लेखी तक्रार एप्रिलमध्ये ग्रामपंचायत केरवडे तर्फ माणगाव, तहसीलदार कुडाळ यांच्याकडे केली होती. संबंधित यंत्रणेने पंचनामा करून वस्तुस्थिती खरी असल्याचा आव आणून मदत मिळवून देवू असे सांगितले; मात्र आज तीन महिने उलटले तरी कोणतीही मदत मिळाली नाही.

आज वृद्ध आईसोबत गळक्‍या व कधीही जमीनदोस्त होवू पाहण्याऱ्या घरात जीव मुठीत धरून राघोजी घाडी राहत होते. अखेर असह्य झाल्याने कुणी घर देता काहो घर म्हणत राघोजी घाडी यांनी न्याय मिळेपर्यंत तुटपुंजा संसार घेऊन उपोषणाचा आधार घेत आपल्या वृद्ध आईसोबत ग्रामपंचायतीच्या वरांड्यातच संसार थाटला. शेवटी सरपंच अंजली जाधव यांनी येत्या आठ दिवसांत तहसील कुडाळकडून मदत मिळवून देवू न्याय न मिळाल्यास तहसील कार्यालयासमोर बेमुदत उपोषण करू, असे लेखी आश्‍वासन दिल्याने उपोषण तूर्त स्थगित करण्यात आले. 

संपादन ः राहुल पाटील