रत्नागिरी - मजूर उपलब्ध झाल्यामुळे अलिबाग तुर्भे येथून 1500 मेट्रिक टन खत मालगाडीतून रत्नागिरी रेल्वे स्थानकात दाखल झाले आहे. त्यामुळे गेले काही दिवस निर्माण झालेल्या खताच्या टंचाईवर मात करणे शक्‍य असून येत्या दोन दिवसांत शेतकऱ्यांना दुकानात खत उपलब्ध होणार आहे. 

खरीपसाठी जिल्ह्यासाठी 20 हजार मेट्रिक टन खताची मागणी केली होती. त्यांपैकी चार हजार मे. टन खत प्राप्त झाले होते. मजूर उपलब्ध नसल्यामुळे रत्नागिरी रेल्वे स्थानकात दाखल झालेले खत उतरवण्यात अडचणी निर्माण झालेल्या होत्या. त्यामुळे पहिल्या तीन गाड्या सोडल्यानंतर आरसीएफकडून खताची गाडीच पाठविण्यात आलेली नव्हती. परिणामी जिल्ह्यात शेतकऱ्यांना खतच मिळत नव्हते.

कोकणात सर्वाधिक भातशेतीला युरिया खत वापरले जाते. पेरण्यांची सुमारे साठ टक्के कामे पूर्ण झाली असून आता खऱ्या अर्थाने खताची मात्रा देणे आवश्‍यक आहे. खत मिळाले नाही तर रोपांची व्यवस्थित वाढ होणे अशक्‍य आहे. त्यामुळे शेतकऱ्यांची तगमग सुरू झाली आहे. या गोष्टीकडे लोकप्रतिनिधींचे पूर्णत: दुर्लक्ष झालेले आहे. कृषी विभागानेही मजूर उपलब्ध करून रत्नागिरीत खत उतरवण्यासाठी पावले उचलली आहेत. सध्या शंभर मजुरांची नोंदणी झालेली आहे. 

भात लागवडीबरोबरच फळबाग लागवडीची कामे सध्या सुरू आहेत. त्यासाठी खतांची आवश्‍यकता भासत असताना खताअभावी शेतकऱ्यांची गैरसोय होत होती. सोमवारी सकाळी मालगाडीतून खत आले असून ते गोदामात सुरक्षित ठेवण्यात आले आहे. पंधराशे टनांत युरिया 800 मेट्रिक टन, तर सुफला सातशे मेट्रिक टन आहे. जिल्हाभरातील शासनमान्य खत विक्रेते आणि विविध कार्यकारी सोसायटींना खत विक्रीसाठी उपलब्ध करून दिले जाणार आहे. शेतकऱ्यांकडून खताची मागणी घेण्यात आली असून ते बांधावर पाठवण्याची व्यवस्था करण्यात आली आहे. 

जिल्ह्यासाठी आवश्‍यक खत प्राप्त झाले आहे. दुसरी गाडी दोन दिवसांत रत्नागिरीत दाखल होईल. त्यामुळे खताचा तुटवडा भासणार नाही. 
- विनोद शेंड्ये, कृषी विकास अधिकारी, जिल्हा परिषद.