मालवण (सिंधुदुर्ग) : मत्स्य विभागाच्या सागरी गस्तीवर पारंपरिक मच्छीमारांचा विश्वास उडाला असून आता पारंपरिक मच्छीमारांनी स्वतःच्या नौकांद्वारे गस्त घालून बेकायदेशीर एलईडी ट्रॉलर पकडण्याचा निर्धार केला आहे. पकडलेल्या एलईडी नौकांवर कायदेशीर कारवाईची प्रक्रिया पूर्ण करण्यासाठी प्रशासनाने पारंपरिक मच्छीमारांना सहकार्य करावे, अशी मागणी निवेदनाद्वारे पारंपरिक मच्छीमार महेंद्र पराडकर यांनी तहसीलदार व पोलिस निरीक्षकांकडे केली आहे.
श्री. पराडकर यांनी आज तहसीलदार अजय पाटणे यांची भेट घेऊन त्यांना निवेदन सादर केले. केंद्र व राज्य सरकारमधील लोकप्रतिनिधींकडून आतापर्यंत पारंपरिक मच्छीमारांची निराशाच झाली आहे. ११ फेब्रुवारी रोजी झालेल्या मत्स्य दुष्काळ परिषदेस उपस्थित मत्स्य अधिकारी तसेच केंद्र व राज्य सरकारमध्ये सहभागी राजकीय पक्षांचे विद्यमान आमदार, माजी आमदार व पदाधिकारी यांच्यासमोर पारंपरिक मच्छीमारांनी आपली मत्स्य दुष्काळाची व्यथा मांडली.
मात्र बेकायदेशीर एलईडी पर्ससीन मासेमारी थांबलेली नाही. त्यामुळे राष्ट्रीय व राज्याच्या हद्दीत बेकायदेशीर एलईडी मासेमारी करणाऱ्या नौका पकडण्यासाठी मच्छीमारच आता गस्त घालतील असा पवित्रा मच्छीमारांनी घेतला आहे. तरी पारंपरिक मच्छीमारांनी पकडलेल्या एलईडी नौकांवर पुढील कायदेशीर कारवाईसाठी प्रशासनाने सहकार्य करावे, अशी मागणी श्री. पराडकर यांनी केली. दरम्यान अशाप्रकारे मच्छीमारांना ट्रॉलर पकडण्याची परवानगी आम्ही देऊ शकत नाही असे तहसीलदारांनी स्पष्ट केले. यासंदर्भात मत्स्य आयुक्तच निर्णय घेऊ शकतात. त्यांना आपल्या निवेदनाची माहिती देतो असे तहसीलदारांनी स्पष्ट केले.
मत्स्य विभागाकडून फसवणूक
श्री. पराडकर म्हणाले, राज्याच्या हद्दीत साधारणतः २५ वावाच्या आत गेले आठवडाभर एलईडी दिव्यांचा प्रकाशझोत किनाऱ्यावरून मच्छीमारांना दिसतोय. परंतु गस्तीला जाणारे मत्स्य विभागाचे अधिकारी १२ सागरी मैलाच्या आत एलईडी नौका नसल्याचे स्पष्टीकरण देतात. १२ सागरी मैलापलिकडे एलईडी नौका कार्यरत असल्याचे ते सांगतात. त्यामुळे मत्स्य विभागाच्या गस्तीवर आमचा विश्वास राहिला नसून केंद्र व राज्याच्या सागरी हद्दीत बेकायदेशीर एलईडी मासेमारी करणाऱ्या नौका पकडण्याचा निर्धार पारंपरिक मच्छीमारांनी केल्याचे श्री. पराडकर म्हणाले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.