रत्नागिरी : समुद्र किनाऱ्यावर पाण्यात चारचाकी वाहने नेण्याचा अतिउत्साह पर्यटकांच्या अंगलट आल्याचा प्रकार रत्नागिरी शहराजवळील भाट्ये किनारी घडला. बुधवारी (१७) सकाळी परजिल्ह्यातून आलेल्या या पर्यटकांना गाडी बाहेर काढण्यासाठी स्थानिक ग्रामस्थांची मदत घ्यावी लागली. जेसीबीच्या साह्याने वाळूत अडकलेली गाडी काढण्यात आली.

हेही वाचा - चक्री वाऱ्याच्या स्थितीमुळे पुढील तीन तासांत रत्नागिरीत अवकाळी पावसाची शक्‍यता

कोरोना कालावधी असला तरीही काही पर्यटक खासगी गाड्या घेऊन कोकणात फिरण्यासाठी येत आहेत. बुधवारी सकाळी फिरण्यासाठी आलेली मुंबईतील एक कुटुंब चारचाकी गाडी घेऊन भाट्ये येथे किनाऱ्यावर गेले. ओहोटीमुळे किनारा मोकळा होता. पर्यटकांनी उत्साहाच्या भरात गाडी पाण्यापर्यंत नेली. वाळूत गाडीची चाके रुतली. चालकाने गाडी बाहेर काढण्यासाठी प्रयत्न सुरू केले. पण गाडी सुरू केल्यानंतर चाके आणखी खोलवर रुतली. प्रयत्न करूनही गाडी काढणे शक्‍य न झाल्यामुळे ते पर्यटक हतबल झाले होते. हा प्रकार फेरीवाल्यांनी ग्रामस्थांच्या निदर्शनास आणला. भरतीला सुरवात झाल्यामुळे पाणी वाढू लागले. पर्यटकांची गाळण उडाली. अखेर जेसीबी आणून त्या साह्याने ती गाडी पाण्याबाहेर काढली.

संपादन - स्नेहल कदम