देवगड (सिंधुदुर्ग) : टेम्पोच्या धडकेत पादचारी मुलाचा मृत्यू झाला. सोहम समीर मिराशी (वय ४) असे त्याचे नाव आहे. तो नाडण खालची मिराशीवाडी येथील होता. हा अपघात काल सकाळी सव्वाआठच्या सुमारास तालुक्‍यातील वाडा ते मोंड मार्गावरील नाडण खालची मिराशीवाडीजवळ घडला. येथील पोलिस ठाण्यात अपघाताची नोंद आहे.

याबाबत पोलिसांनी दिलेली माहिती अशी, की तालुक्‍यातील नाडण खालची मिराशीवाडी येथील सोहम आणि त्याचे आजोबा वाडा ते मोंड अशा जाणाऱ्या डांबरी रस्त्याच्या बाजूने मोंडच्या दिशेने जात होते. नाडण सडेवाडी येथील टेम्पोचालक मोंडच्या दिशेने जात होता. यावेळी टेम्पोची सोहमला धडक बसली. त्यात तो गंभीर जखमी झाला. रक्‍तस्राव सुरू झाला.

हेही वाचा - वीज बिल माफीचा निर्णय घ्यावा ; अन्यथा ऊर्जामंत्र्यांना फिरू देणार नाही
 

जखमी अवस्थेत त्याला नातेवाईकांनी तातडीने येथील एका खासगी रुग्णालयात दाखल केले; मात्र त्याचा मृत्यू झाला. याची माहिती मिळताच पोलिसांनी घटनास्थळी भेट देऊन माहिती घेतली. येथील ग्रामीण रुग्णालयात शवविच्छेदन करण्यात आले. तेथे ग्रामस्थांनी गर्दी केली होती. सहायक पोलिस निरीक्षक संजय कातिवले यांच्या मार्गदर्शनाखाली सहायक उपनिरीक्षक दशरथ चव्हाण तपास करीत आहेत. दरम्यान, उपविभागीय पोलिस अधिकारी नितीन कटेकर यांनी अपघातग्रस्त ठिकाणाला भेट देऊन पाहणी केली.

संपादन - स्नेहल कदम