चिपळूण : गणेशोत्सवासाठी (Konkan Ganeshotsav) चाकरमान्यांनी कोकणाची वाट धरली आहे. त्यामुळे चिपळूण रेल्वे स्थानकावर (Chiplun Railway Station) गावाला येणाऱ्या चाकरमान्यांची प्रचंड गर्दी झाली आहे.

गणेशोत्सवासाठी स्पेशल गाड्या सोडल्या आहेत. मात्र, या रेल्वेचे वेळापत्रक कोलमडल्याने गाड्या उशिराने धावत आहेत. त्यामुळे चाकरमान्यांचा खोळंबा होत आहे. दुसरीकडे एसटी आणि खासगी बसेसनाही प्रचंड गर्दी झाल्याने चाकरमान्यांची रखडपट्टी झाली आहे.

कुटुंबासह गावाकडे जायला निघालेल्या चाकरमान्यांची तारांबळ उडाली आहे. गणपती स्पेशल ट्रेनमुळे कोकण रेल्वेचे वेळापत्रक दुसऱ्या दिवशी कोलमडले आहे. अनेक गाड्या अर्धा ते ४ तासांपर्यंत उशिराने धावत आहेत. कोकणकन्या, तुतारी, मेंगलोर एक्स्प्रेस, कुडाळ गणपती स्पेशल, दिवा – रत्नागिरी या गाड्या विलंबाने धावत आहेत.

मुंबईकडून तळकोकणात येणाऱ्या मार्गावर अनेक गाड्या खोळंबल्या आहेत. वीरपासून तळकोकणापर्यंत कोकण रेल्वेचा सिंगल ट्रॅक आहे. मुंबईहून तळ कोकणात जाण्यासाठी रेल्वेने १२ तास लागत आहे. चार तास गाड्या उशिराने धावत असल्याने प्रवाशांना रेल्वे स्थानकावरच चार तास खोळंबून राहावे लागत आहे.