चिपळूण (रत्नागिरी) : गोवळकोट बंदरावरील चार ऐतिहासिक तोफा काढून गोवळकोटच्या किल्ल्यावर सुरक्षित ठेवल्या जाणार आहेत. राजे प्रतिष्ठानकडून हा कार्यक्रम हाती घेण्यात आला आहे. 

चिपळूण शहराची शान म्हणून गोवळकोटच्या ऐतिहासिक किल्ल्याकडे पाहिले जाते. या गोविंद गडावर आणि गोवळकोट बंदरावर ऐतिहासिक तोफा आहेत. शुक्रवारी (ता. 19) सकाळी 10 वा. शिवजयंतीच्या निमित्ताने चारही तोफा काढण्यात येणार आहेत. गोवळकोटमधील राजे सामाजिक प्रतिष्ठान, गोवळकोट ग्रामस्थ यांच्यावतीने कोरोनाचे सर्व नियमांचे पालन करून या तोफा काढल्या जाणार आहेत. गडकिल्ले संवर्धन समिती सदस्य डॉ. सचिन जोशी, इतिहास अभ्यासक संदीप परांजपे, पुरातत्त्व विभाग रत्नागिरी, महाराष्ट्र मेरीटाईम बोर्ड, कस्टम डिपार्टमेंट, तहसीलदार, पोलिस प्रशासन, स्थानिक लोकप्रतिनिधी यांच्या उपस्थितीत हा कार्यक्रम होणार आहे. या कार्यक्रमाला उपस्थित राहण्याचे आवाहन राजे सामाजिक प्रतिष्ठानकडून करण्यात आले आहे. 

हेही वाचा - कोकणात होमिओपॅथी डॉक्‍टरांनी पिकवली स्ट्रॉबेरी शेती! ; एक हजार किलो उत्पादनाचा अंदाज -

ठेवा नष्ट होऊ नये, यासाठी.. 

गोवळकोट बंदरावर गेली कित्येक वर्षे पुरलेल्या अवस्थेत असलेल्या तोफा आतल्या आत गंजून त्यांचा भुगा होण्याचा धोका होता. कोकणच्या लष्करी इतिहासाच्या दृष्टिकोनातून अत्यंत मोलाचा हा ठेवा नष्ट होऊ नये, यासाठी बंदरावर पुरलेल्या 10 तोफांपैकी 6 तोफा काढून ऐतिहासिक किल्ले गोविंद गडावर सुरक्षित ठेवण्यात आल्या आहेत. या ऐतिहासिक तोफा पाहण्यासाठी अनेक गडप्रेमी, शिवप्रेमी गडावर येऊन तोफा पाहतात. उर्वरित चार तोफा गोवळकोट बंदरावर अजूनही पुरलेल्या आहेत.  

संपादन - स्नेहल कदम