गुहागर - तालुक्‍यातील रानवी, पडवे, शिर, अडूर, कोंडकारुळ, वेळणेश्वर, साखरीबुद्रक, तळवली, पेवे, नरवण, कोळवली, मळण, उमराठ, शिवणे, जामसुद आणि गिमवी या 16 ग्रामपंचायतींमध्ये सरपंच, उपसरपंच निवडीची प्रक्रिया आज पार पडली. मळण ग्रामपंचायतीमध्ये बिनविरोध निवडून आलेले शिवसेनेचे नारायण पांडुरंग गुरव सरपंचपदी तर राष्ट्रवादीचे कार्यकर्ते रमाकांत गंगाराम सोलकर उपसरपंचपदी बिनविरोध निवड झाली. पेवे ग्रामस्थांनी यावर्षी बिनविरोध निवडणूक केली. सरपंच, उपसरपंच पदाची निवडणूकही बिनविरोध झाली. यामध्ये भारती भिकाजी सावरटकर यांच्याकडे सरपंच पद आणि किशोर चिवेलकर यांच्याकडे उपसरपंच पद सोपविण्यात आले.

अडूर ग्रामपंचायतीची निवडणूक अटीतटीची झाली. यामध्ये माजी उपसभापती पांडुरंग कापले यांनी उभ्या केलेल्या पॅनेलला बहुमत मिळाले. येथे सरपंचपदी शैलजा हरिचंद्र गुरव तर उपसरपंचपदी उमेश मधुसुदन आरस यांची बिनविरोध निवड करण्यात आली. कोंडकारुळ ग्रामपंचायतीमध्ये 8 सदस्य गावाने बिनविरोध निवडून आणले. त्याच्यापैकी निलिमा प्रताप अडूरकर सरपंच पदी तर अशोक सोमा अडूरकर उपसरपंचपदी बिनविरोध निवड झाली. उमराठमध्ये सरपंच, उपसरपंच पदाची निवडणूक बिनविरोध झाली. जनार्दन पांडुरंग आंबेकर यांच्याकडे सरपंच तर सुरज अरुण घाडे उपसरपंच पदाची जबाबदारी गावाने सोपविली आहे. 

हे पण वाचा -  उपसरपंचच खुर्चीत बसण्यास नकार देतात तेंव्हा...

कमिटीचा निर्णय मानावा लागणार 
वेळणेश्वरमध्ये ग्रामपंचायत निवडणुकी दरम्यान गावाची कोअर कमिटी बनविली आहे. ही कमिटी देईल तो निर्णय पुढील पाच वर्ष बिनविरोध निवडून आलेल्या सदस्यांना मानावा लागणार आहे. सरपंचपदासाठी चैतन्य धोपावकर आणि उपसरपंचपदासाठी अमोल जामसुतकर यांची निवड झाली. वेळणेश्वरप्रमाणेच तळवलीमध्ये ग्रामविकास आघाडीच्या प्रमुख मंडळींनी निश्‍चित केलेल्या मयुरी महेश शिगवण सरपंच म्हणून तर अनंत गंगाराम डावल उपसरपंचपदी बिनविरोध निवडून आले. 

संपादन - धनाजी सुर्वे