रत्नागिरी : एप्रिल ते डिसेंबर २०२० या कालावधीत मुदत संपलेल्या आणि लॉकडाउनमुळे पुढे ढकलण्यात आलेल्या जिल्ह्यातील ४७९ ग्रामपंचायतींची सार्वत्रिक निवडणूक १५ जानेवारीला होणार आहे. आचारसंहिता जाहीर झाली असून, ऐन थंडीत गावोगावी निवडणूक रणधुमाळी सुरू होणार आहे. 

राज्यात तीन पक्षांची महाविकास आघाडी असली तरीही ग्रामपंचायत स्तरावर शिवसेना विरुद्ध राष्ट्रवादी काँग्रेस आमनेसामने लढण्याची शक्‍यता आहे. भाजपही ताकदीने रणांगणात उतरणार असल्याचे संकेत आहेत. दरम्यान, निवडणूक होणाऱ्या ग्रामपंचायत क्षेत्रात आचारसंहिता लागू झाली आहे.

हेही वाचा - गणपतीपुळेत उभारणार आर्टिफिशिअल बंधारा ; प्रवाहाला बसणार आता ‘ब्रेक’ -

राजकीय आघाडीवर

रत्नागिरी जिल्हा शिवसेनेचा बालेकिल्ला असला तरीही राष्ट्रवादी काँग्रेसने दापोली, खेड, मंडणगड, गुहागर, चिपळुणात चांगले हातपाय पसरले आहेत. राज्यात सत्तेत शिवसेना, काँग्रेस आणि राष्ट्रवादी महाविकास आघाडी कार्यरत आहेत. 

गावपातळीवरील राजकारण वेगळेच असल्याने ही आघाडी राहणे शक्‍य नाही. त्यामुळे यंदाच्या निवडणुकीत शिवसेना, ‘राष्ट्रवादी’च्या नेत्यांची कसोटी आहे. निवडणुकीची शक्‍यता असल्याने गेल्या काही दिवसांत गावागावांत बैठका झडू लागल्या आहेत. वातावरण तयार झाले असून, उमेदवार निवडणे यासह मेळाव्यांचे नियोजन पक्षाच्या नेत्यांवर अवलंबून आहे. रत्नागिरी तालुका वगळता अन्य सगळीकडे गावागावांत आघाडीत बिघाडी दिसेल. याच संधीचा फायदा भाजप उठवण्याची शक्‍यता व्यक्‍त आहे. त्यादृष्टीने भाजप नेते तयारीला लागले आहेत. रत्नागिरीत शिवसेनेकडून जिल्हा परिषद गटनिहाय मेळाव्याचे आयोजन काही दिवसांपूर्वी करण्यात आले होते.

तालुका       ग्रामपंचायती

मंडणगड          १५
दापोली            ५७
खेड               ८७
चिपळूण          ८३
गुहागर           २९
संगमेश्‍वर        ८१
रत्नागिरी         ५३
लांजा            २३
राजापूर          ५१

हेही वाचा -  पैशाची व मोबाईलची मागणी करत ट्रक चालकावर चाकूने केला हल्ला -

संपादन - स्नेहल कदम