मंडणगड (रत्नागिरी) : कोरोना सारखी जागतिक महाभयानक आपत्तीची वस्तुस्थिती समोर असताना हद्दीचा बाऊ व सरकारी आदेशाची वाट बघत न बसता मंडणगड नगरपंचायतीने भिंगलोळी ग्रामपंचायत हद्दीत येणाऱ्या तहसिल कार्यालय, पोलिस स्टेशन, ग्रामीण रुग्णालय व हनुमान मंदिर परिसरात जंतुनाशक व हायपोक्लोरिटची फवारणी करून परिसर निर्जंतुकीकरण केले. यामुळे मंडणगड नगरपंचायतीने एकमेका साह्य करू अवघे धरू सुपंथ या उक्ती खऱ्या करून दाखविल्या.

 मंडणगड तहसीलदार नारायण वेंगुर्लेकर, मंडणगड पोलिस निरीक्षक सुदाम शिंदे यांनी नगरपंचायत प्रशासनाशी संपर्क साधून तहसील कार्यालय तसेच पोलीस स्टेशन परिसर येथे जंतुनाशक फवारणी व सोडियम हायपोक्लोरिटने परिसर निर्जंतुकीकरण करून द्या अशी विनंती केली होती. ही दोन्ही कार्यालये भिंगळोली ग्रामपंचायत हद्दीत येतात.

सरकारी पातळीवर हद्दीचा बाऊ

भिंगळोली ग्रामपंचायत पदाधिकारी देखील वारंवार नगरपंचायत प्रशासनाशी संपर्क साधून विनंती करीत होते. त्यांच्याकडे अत्याधुनिक फौगर, स्पेअर नव्हते. अडचणी दोन होत्या. एकतर मंडणगड शहर स्वच्छतेची मोहीम युद्धपातळीवर सुरू आहे आणि दुसरी म्हणजे हद्दीची अडचण होती. मंडणगड तहसील कार्यालय, पोलीस स्टेशन आणि मंडणगड नगरपंचायत कार्यालय ही दोन्ही कार्यालये वेगवेगळ्या हद्दीत असली तरी दोन्ही कार्यालयांत अंतर फक्त दीड किलोमीटर आहे. परंतु सरकारी पातळीवर हद्दीचा खूप बाऊ केला जातो.

हेही वाचा- गावागावात धुर आणि औषध फवारणीमध्ये येतात हे अडथळे ;  ग्रामपंचायतींचे दुर्लक्ष..

हद्दींचा बाऊ का करायचा? ​

मंडणगड तहसील कार्यालय, पोलीस स्टेशन, ग्रामीण रूग्णालय येथे मंडणगड शहरातील नागरिकांची ये-जा असते. तसेच भिंगळोलीतील ग्रामस्थ सुद्धा मंडणगड शहरात अत्यावश्यक सेवांसाठी येत असतात. एकंदरीत वस्तुस्थिती समोर असताना हद्दींचा बाऊ का करायचा? दुसर्या सरकारी कार्यालयांना साह्य करतांना सरकारी आदेश हवाच कशाला?

नगरपंचायतीने मंडणगड शहर स्वच्छतेची मोहीम काही तासांसाठी थांबवण्यात आली. भिंगळोली ग्रामपंचायत हद्दीतील तहसील कार्यालय, पोलीस स्टेशन, ग्रामीण रूग्णालय, हनुमान मंदिर परिसर येथे फौगींग (जंतुनाशक फवारणी), स्प्रेईंग (Sodium hypochlorite) पूर्ण केली. तसेच तालुक्यातील अनेक ग्रामपंचायतीना गावाचा पूर्ण परिसर फवारणी करावी लागणार असल्याने फवारणीचे पंप भाड्याने देणाऱ्या एजन्सीचे नावं व पत्ता, जंतुनाशक, सोडियम हायपोक्लोरिट विकत देणाऱ्या एजन्सीचे नाव व‌ पत्ता देण्यात येत आहेत.

हेही वाचा-रत्नागिरी - तबलिगीशी संबंधित आठ जण आयसोलेशनमध्ये

परिस्थितीचे गांभीर्य आणि आवश्यकता ओळखून केले काम

कोरोना सारख्या जागतिक आपत्ती मध्ये ' वस्तुस्थिती ' बघून निर्णय घ्यायचे की सरकारी आदेशाची वाट बघत बसायची? संविधानकारांनी लोकशाही व्यवस्था स्वीकारली तेव्हा त्यांना समन्वय अपेक्षीत होता की अडवणूक? परिस्थितीचे गांभीर्य आणि आवश्यकता ओळखून निर्जंतुकीकरण करून परिसर सुरक्षित केला.
- संतोष माळी, मुख्याधिकारी मंडणगड नगरपंचायत.
--