खेड : खेड शहर भाजप कार्यालयातील केंद्रीय मंत्री नारायण राणे यांच्या स्वागताचे बॅनर आज दुपारी तीन युवासैनिकांनी फाडल्याने खेडमध्ये तणावाचे वातावरण निर्माण झाले आहे. माजी नगराध्यक्ष आबा जोशी यांच्या समोरच ही घटना घडली. युवा सेनेचे जिल्हाधिकारी अजिंक्य मोरे हे त्यांच्या दोन साथीदारांसह कार्यालयासमोर आले आणि कार्यालयातील महिला कर्मचारी यांच्याबरोबर जोरजोराने वाद घालू लागले व त्याच वेळेस त्यांनी तेथील बॅनर फाडले व लगेच तेथून त्यांच्या दुचाकीने निघून गेले.

थोड्या वेळातच शहरअध्यक्ष अनिकेत कानडे तेथे आल्यानंतर त्यांच्या हा प्रकार लक्षात आला. त्यानंतर त्यांनी तात्काळ भाजपच्या वरिष्ठांशी संपर्क साधून पुढे काय करायचे याबाबत निर्णय घेतला. जवळच्या सीसीटीव्ही फुटेजमध्ये हा प्रकार रेकॉर्ड झाला आहे. त्या दृष्टीने खेड पोलिस तपास करत आहेत. सायंकाळी खेड पोलिस ठाण्यात बॅनर फाडणाऱ्याच्या विरोधात रितसर तक्रार नोंदवण्यात आली आहे. दुपारी अचानक झालेल्या या प्रकारामुळे खेड पोलिस भाजपच्या कार्यालयाजवळ पहारा देत आहेत.

केंद्रीय मंत्री नारायण राणे यांनी जनआशीर्वाद यात्रेदरम्यान मुख्यमंत्र्यांच्या बाबत केलेल्या आक्षेपार्ह विधानाचा राग ठेवून या युवासैनिकांनी हे कृत्य केले असण्याची शक्यता आहे. कारण खेड येथे या सुवासैनिकांनी नारायण राणे यांच्या विरोधात जोरदार घोषणाबाजी केली होती. त्यावेळेला भाजपचे शहरअध्यक्ष अनिकेत कानडे आणि युवासैनिकांमध्ये वाद झाला होता. त्यानंतर आठ दिवसानंतर हा प्रकार झाल्याने तर्क वितर्क लढवले जात आहेत.