Guhagar News: तालुक्यातील शृंगारतळी बाजारपेठेतील सांबसदाशिव बिल्डिंगमध्ये चालणाऱ्या जुगार अड्ड्यावर गुहागर पोलिसांनी कारवाई केली आहे.

या अड्ड्यावर तब्बल ६४ हजार १५० रुपयांचा माल हस्तगत केला. सोमवारी रात्री ९.३० वाजता शृंगारतळीतील सांबसदाशिव बिल्डिंगमध्ये सुरू असलेल्या जुगारावर पोलिस निरीक्षक सचिन सावंत यांनी आपल्या सहकाऱ्यांसमवेत छापा टाकला.

त्या वेळी जुगार खेळत असताना शृंगारतळी येथील अभी वेल्हाळ, मंगेश शेटे (जानवळे), मंगेश सीताराम गांधी (मुंढर), प्रमोद दळी (पालपेणे), विश्वास बेलवलकर (शृंगारतळी) हे मिळून आले. या वेळी तब्बल ५१ हजार ८४० रुपये व इतर साहित्य मिळून ६४ हजार १५० रुपयांचा माल हस्तगत केला.

गुहागर पोलिसांनी जुगार खेळताना मिळून आलेल्या चौघांवर जुगार प्रतिबंधक कायदा ४ व ५ प्रमाणे पहाटे २ वाजता गुन्हा दाखल केला.

अल्पवयीन मुलीची आत्महत्या

Crime News: कोळंबे परिसरातील एका अल्पवयीन मुलीने गळफास घेऊन आत्महत्या केली. ही पूर्णगड सागरी सुरक्षा पोलिस ठाण्यात आकस्मिक मृत्यूची नोंद करण्यात आली आहे. ही घटना ३० एप्रिलला सायंकाळी चार ते साडेसहाच्या सुमारास घडली. पोलिसांकडून मिळालेल्या माहितीनुसार, अज्ञात कारणातून मुलीने आंब्याच्या कलमाला नायलॉन दोरीने गळफास घेऊन आत्महत्या केली.

आजाराला कंटाळून वृद्धाची आत्महत्या

मणक्याच्या त्रासाला कंटाळून घराच्या छताच्या लोखंडी बाराला नायलॉनची दोरी बांधून वृद्धाने गळफास घेऊन आत्महत्या केली. मुरलीधर मुकुंद शिरधनकर (वय ६९, रा. नांदिवडे, रत्नागिरी) असे आत्महत्या केलेल्या वृद्धाचे नाव आहे.

ही घटना बुधवारी (ता. १) सकाळी पावणेनऊच्या सुमारास निदर्शनास आली. पोलिसांकडून मिळालेल्या माहितीनुसार, शिरधनकर यांना दोन महिन्यांपासून मणक्याचा त्रास होता. त्यामुळे ते कामही करू शकत नव्हते. आजाराला कंटाळून त्यांनी बुधवारी आत्महत्या केली. जयगड पोलिस ठाण्यात आकस्मिक मृत्यूची नोंद करण्यात आली आहे.