देवगड (सिंधुदुर्ग) - कोकणची दक्षिण काशी म्हणून ओळख असलेल्या तालुक्‍यातील श्री क्षेत्र कुणकेश्‍वर मंदिरात उद्यापासून (ता.11) महाशिवरात्री यात्रेचा प्रारंभ होणार आहे. यंदा यात्रा साधेपणाने होणार आहे. त्यामुळे बाहेरून येणारे भाविक भक्‍त, पाहुणे मंडळी, भजनी मंडळे, वारकरी सांप्रदायिक मंडळी, यात्रेकरू, पर्यटक, बाहेरील व्यापारी यांनी यात्रोत्सवात सहभागी न होण्याचे आवाहन कुणकेश्‍वर ग्रामस्थ आणि श्री देव कुणकेश्‍वर मंदिर देवस्थान ट्रस्टच्यावतीने करण्यात आले आहे. कोरोनाच्या पार्श्‍वभूमीवर निर्णय घेण्यात आला आहे. तरीही यात्रेच्या पार्श्‍वभूमीवर देवस्थानने आवश्‍यक तयारी केली आहे. 

तालुक्‍यातील कुणकेश्‍वर मंदिरात महाशिवरात्रीदिनी उद्यापासून (ता.11) यात्रेला प्रारंभ होईल. शनिवारी (ता.13) दरवर्षीप्रमाणे समुद्रस्नानाने यात्रेची सांगता होईल. मात्र दरवर्षी गजबजाटाने भरून जाणारी यात्रा यंदा कोरोनाच्या पार्श्‍वभूमीवर ग्रामस्तरावर साधेपणाने घेण्याचा निर्णय देवस्थान ट्रस्टच्यावतीने घेण्यात आला आहे. नागरिकांच्या आरोग्याचा विचार करता यंदाचा यात्रोत्सव साध्या पध्दतीने करण्याचा निर्णय घेण्यात आला आहे. यावर्षी महाशिवरात्री यात्रा कालावधीमध्ये दुकाने, खेळ, पाळणे, हॉटेल, इतर व्यापारी यांना यात्रेत सहभागी होता येणार नाही. कुणकेश्‍वर गावस्तरावर मंदिरामध्ये होणारी पारंपरिक धार्मिक विधीवत पूजा आदी कार्यक्रम केले जाणार आहेत.

शासनाचे आदेशासह निर्बंधांचे पालन करून ग्रामस्तरावर यात्रा उत्सव केला जाणार आहे. त्यामुळे बाहेरून येणाऱ्या भाविक भक्‍तांना, पाहुणे मंडळींना, भजनी मंडळीना, वारकरी सांप्रदायिक मंडळे, रथयात्रींना, यात्रेकरूंना, पर्यटकांना, बाहेरील व्यापाऱ्यांना तसेच आजूबाजूच्या व्यक्‍तींनी उत्सव काळात श्री देव कुणकेश्‍वर यात्रोत्सवात सहभागी न होता सहकार्य करण्याचे आवाहन कुणकेश्‍वर ग्रामस्थ आणि कुणकेश्‍वर देवस्थान ट्रस्टच्यावतीने करण्यात आले आहे.

उत्सव साधेपणाने होणार असला तरीही मंदिरातील सर्व कार्यक्रम दरवर्षीप्रमाणे होतील. येणाऱ्या भाविकांच्या सोयीसाठी मंदिर परिसरात एकच मार्ग तयार करण्यात आली आहे. दरवर्षीप्रमाणे अन्य दर्शनरांगा नाहीत. मंदिरावर रोषणाई करण्यात आली आहे. मंदिर सभोवती भाविकांना फिरता येणार नाही. मंदिराच्या मंदिराजवळील रस्त्याची डागडुजी करण्यात आले आहे. मास्क लावल्याशिवाय मंदिरात प्रवेश दिला जात नाही. 

यंदा प्रथमच गजबजाट नाही 
यंदा प्रथमच कुणकेश्‍वर यात्रेत गजबजाट असणार नाही. देवस्वाऱ्यांचा अलौकिक कार्यक्रम यंदा होणार नाही. तालुक्‍यातील कलींगड व्यावसायिकांनाही दुकाने थाटता येणार नाहीत. यात्रेनिमित्त होणारी उलाढाल मर्यादित असेल.

संपादन - राहुल पाटील