राजापूर ( रत्नागिरी ) - खुल्या महिला प्रवर्गासाठी आरक्षित झालेल्या राजापूर पंचायत समितीच्या सभापती आणि उपसभापती पदासाठी शिवसेनेच्या अनुभवी सदस्यांमध्ये जोरदार रस्सीखेच आहे. बहुमत असलेल्या सत्ताधारी सभापतिपदासाठी तीन महिला तर, उपसभापती पदासाठी दोन सदस्य इच्छुक असून त्याचा अहवाल वरिष्ठांकडे पाठविण्यात आल्याची माहिती शिवसेनेचे तालुकाप्रमुख प्रकाश कुवळेकर यांनी दिली. 

सभापती आणि उपसभापती पदाची माळ नेमकी कोणाच्या गळ्यात पडणार, याची साऱ्यांना उत्सुकता लागली आहे. सभापतीपदाची निवडणूक सोमवारी (ता. 30) होणार आहे. बारा सदस्यसंख्या असलेल्या शिवसेनेचे नऊ सदस्य असून या बहुमताच्या जोरावर पंचायत समितीवर शिवसेनेचे वर्चस्व आहे. गेली अडीच वर्ष सभापती आणि उपसभापतीपद शिवसेनेकडे राहिले आहे. आगामी अडीच वर्षासाठी सभापतीपद खुल्या महिला प्रवर्गासाठी आरक्षित झाले आहे. त्यासाठी सभापतीपदासाठी शिवसेनेकडून विशाखा लाड, करूणा कदम आणि प्रमिला कानडे या इच्छुक आहेत. उपसभापती पदासाठी ज्येष्ठ सदस्य प्रकाश गुरव आणि उन्नती वाघरे इच्छुक आहेत. त्यांच्यामधून सभापती आणि उपसभापतीपदाचे उमेदवार म्हणून निवड केली जाणार आहे. 

हेही वाचा - नारायण राणेंचा सावंतवाडी नगरपालिकेसाठी हा डाव 

अनुभवी इच्छुक 

सभापतीपदासाठी इच्छुक असलेल्या तीनही सदस्यांकडे प्रशासकीय कामकाजाचा अनुभव आहे. विशाखा लाड आणि करूणा कदम यांनी पंचायत समिती सदस्य म्हणून सभागृहात या वेळी पहिल्यांदाच प्रवेश केला असला तरी, गेल्या अडीच वर्षातील कामकाजाचा अनुभव आणि यापूर्वी सरपंच म्हणून कामकाजाचा अनुभव त्यांच्या गाठीशी आहे. प्रमिला कानडे या पंचायत समिती सदस्य आहेत. उपसभापतीपदासाठी इच्छुक ज्येष्ठ सदस्य प्रकाश गुरव यापूर्वी पंचायत समितीचे उपसभापती आहेत. 

हेही वाचा - कोल्हापूर जिल्हा परिषद सदस्य निघाले सहलीला; कारण काय ? 

बहुमतामुळे सभापती शिवसेनेचाच
राज्यामध्ये महाविकासआघाडी असली तरी, स्थानिक पातळीवर अशा प्रकारची आघाडी करण्याचे सध्या वरिष्ठांकडून कोणतेही निर्देश आलेले नाहीत. त्यामुळे पंचायत समितीमध्ये सद्यस्थितीमध्ये महाविकासआघाडी होणार नाही. बहुमत असलेल्या शिवसेनेचाच सभापती, उपसभापती होईल. 
- प्रकाश कुवळेकर, शिवसेना तालुकाप्रमुख