मालवण (सिंधुदुर्ग) - पर्सनेटच्या मासेमारीस बेकायदेशीररित्या वापरला जाणारा आणखी एक एलईडी बल्ब काल (ता. 21) कोळंब सोमती समुद्रकिनारी आढळून आला. सहा दिवसांत तिसऱ्यावेळेस एलईडी बल्ब सापडला आहे. या बल्बचा पंचनामा करण्यास पोलिसांनी नकार देत हे काम मत्स्यव्यवसाय विभागाचे असल्याचे स्पष्ट केले. 

दरम्यान, मत्स्य व्यवसाय विभागाने समुद्र किनारी सापडणारे एलईडी बल्ब हा समुद्र कचरा आहे, यामुळे त्यांचा पंचनामा करणे आवश्‍यक नसल्याचे सांगितले. यामुळे आता संशयास्पदरित्या सापडणाऱ्या एलईडी बल्बची जबाबदारी कोणाची असा प्रश्‍न मच्छीमारांना पडला आहे. 

पाच दिवसांतील वादळी हवामानामुळे विविध प्रकारचा समुद्री कचरा किनाऱ्यावर वाहून येत आहे. यात सिलिंडर, एलईडी मासेमारीसाठी वापरले जाणारे बल्ब यांचा समावेश आहे. स्थानिक मच्छीमारांनी दक्ष नागरिक म्हणून याची माहिती पोलिसांना दिली. दांडी येथे सापडलेले दोन एलईडी बल्ब पोलिसांनी घटनास्थळी जाऊन पंचनामा करत ताब्यात घेतले होते. परंतु कोळंब समुद्रकिनारी आढळून आलेला एलईडी बल्ब ताब्यात घेण्यास पोलिसांनी असमर्थता दर्शवित हे काम मत्स्यव्यवसाय विभागाचे असल्याचे स्पष्ट केले. 

मत्स्य व्यवसाय विभागाचे परवाना अधिकारी मुरारी भालेकर यांच्याशी संपर्क साधला असता त्यांनी पोलिस ठाण्यातून एलईडी बल्बची माहिती देण्यात आली आहे; मात्र तो समुद्री कचरा असल्याने आम्ही तो गोळा करत बसायचा का? असा प्रश्‍न केला. एलईडी मासेमारी होत आहे हे सर्वश्रुत आहे. त्यामुळे सापडणारे एलईडी बल्ब गोळा करण्याची आवश्‍यकता नसल्याचेही त्यांनी सांगितले. 

बल्ब सापडण्याचे प्रमाण वाढले 
कोळंब समुद्र किनारी सापडलेल्या एलईडी बल्बबाबत महेंद्र पराडकर यांनी पोलिसांना माहिती दिली. त्यांनी पोलिसांनी केलेल्या सूचनेनुसार सहायक मत्स्यविकास अधिकारी तेजस्विता करंगुटकर यांच्याशी संपर्क साधला. किनारपट्टीवर एलईडी बल्ब सापडण्याचे प्रमाण वाढत आहे; मात्र पोलिस, मत्स्य व्यवसाय विभागाकडून हे बल्ब ताब्यात घेण्याची कार्यवाही होत नसल्याने मच्छीमारांनी नाराजी व्यक्त केली आहे.