चिपळूण - तालुक्यातील गुढेफाटा ते पाथर्डी रस्त्यावर मोटारसायकलने जाणाऱ्या तरुणांकडून एक सिंगल बॅरल बंदूक व बिबट्याचे कातडे जप्त करण्यात येथील पोलिसांना यश आले आहे. या प्रकरणी दोघांना ताब्यात घेतले. याचवेळी खेड हद्दीतील मौजे मुरडे शिंदेवाडी येथील एका घरावर पोलिसांनी छापा टाकून विनापरवाना असलेली बंदूक जप्त केली. या प्रकरणी केलेल्या चौकशीनंतर तळवटपाल उपाळेवाडी येथे छापा टाकून बंदूक निर्मितीसाठी लागणारे साहित्य जप्त केले आहे. चिपळूण गुढेफाटा येथे रत्नागिरीच्या स्थानिक गुन्हे शाखेने केलेल्या कारवाईअंतर्गत सचिन रामचंद्र साखरकर (३६, रा. डुगवे, साखरकरवाडी), प्रदेश प्रकाश बुदर (४०, बुदरवाडी गुढे) यांना अटक केली. त्यांच्याकडून बिबट्याचे कातडे, सिंगल बॅरल काडतुसाची परवाना नसलेली बंदूक आणि ४ जिवंत काडतुसे जप्त केली.

पोलिसांनी दिलेल्या माहितीनुसार पोलिस अधीक्षक मोहितकुमार गर्ग यांनी वन्यजीव सरंक्षणाच्या अनुषंगाने कारवाई करण्याचे आदेश दिले होते. सोमवारी स्थानिक गुन्हे शाखेला चिपळूण तालुक्यातील गुढेफाटा येथे पाथर्डी रस्त्यावर दोन व्यक्तींच्या संशयास्पद हालचालीबाबत माहिती मिळाली होती. त्यानुसार तेथे जाऊन संशयास्पद तरुणांची मोटारसायकल थांबवली. त्यांच्या सॅकची तपासणी केली. त्यामध्ये बिबट्याचे कातडे, सिंगल बॅरल काडतुसची बंदूक व ४ जिवंत काडतुसे मिळाली. त्याप्रमाणे मोटारसायकलसह अन्य साहित्य जप्त केले आहे. या कारवाईत सहाय्यक पोलिस फौजदार प्रशांत शिंदे, पोलिस उपनिरीक्षक विनायक माने, स्थानिक गुन्हे अन्वेषण शाखेचे प्रशांत बोरकर, पोलिस हवालदार नितीन डोमणे, अरुण चाळके, बाळू पालकर, योगेश नार्वेकर, सत्यजित दरेकर व दत्तात्रय कांबळे यांनी सहभाग घेतला. त्यांना वनविभागाचे दत्ताराम राजाराम सुर्वे यांनी मदत केली.

शिंदेवाडीतील घरावर छाप्यातील कारावाईत दोघांवरखेडचे उपविभागीय पोलिस अधिकारी शशिकांत काशीद, पोलिस निरीक्षक निशा जाधव यांच्या मार्गदर्शनाखाली सहाय्यक पोलिस निरीक्षक सुजित गडदे, पोलिस हवालदार विक्रम बुरॉडकर, संकेत गुरव, रोहित जोयशी, किरण चव्हाण यांनी सहभाग घेतला.

शिंदेवाडीतील घरावर छापा, बंदूक जप्त

दुसऱ्या घटनेत खेडचे सहायक पोलिस निरीक्षक सुजित गडदे यांना मिळालेल्या माहितीनुसार मौजे मुरडे-शिंदेवाडी येथील सचिन संतोष गोठल (वय २३) याच्या घरावर छापा टाकला. या कारवाईत विनापरवाना असलेली बंदूक जप्त केली. अधिक चौकशीअंती ही बंदूक पांडुरंग केशव सुतार ऊर्फ मेस्त्री (५३, रा. तळवटपाल, उपाळेवाडी खेड) यांच्याकडून खरेदी केल्याचे समजले. त्याप्रमाणे सुतार यांच्या घरावर छापा टाकला असता, तेथे एक बंदूक व बंदूक निर्मितीसाठी आवश्यक असलेले साहित्य जप्त केले. त्यानुसार या दोघांवर पोलिस शिपाई संकेत गुरव यांनी गुन्हा दाखल केला आहे. मंगळवारी त्यांना न्यायालयात हजर केले असता १४ एप्रिलपर्यंत पोलिस कोठडी सुनावली आहे.