देवगड : तालुक्यातील पडेल येथे नळयोजना कामासाठीचे खोदकाम सुरू असताना एक मूर्ती सापडली. मूर्ती सापडल्याचे कळताच स्थानिकांनी धाव घेतली. ती विष्णूची मूर्ती (Vishnu Idol) असावी, असा इतिहास अभ्यासकांचा प्राथमिक अंदाज आहे.

पडेल गावात नळयोजना पाईप लाईन टाकण्यासाठी खोदाईचे काम सुरू आहे. काम सुरू असतानाच तेथील एका मंदिरालगत एक मूर्ती आढळली. मूर्ती मातीबाहेर काढण्यात आली. मूर्ती सापडल्याचे कळताच ग्रामस्थांनी तिकडे धाव घेतली.

अनेकांनी मोबाईलमध्ये मूर्ती टिपण्यासाठी धडपड केली. ही मूर्ती सापडताच शंकरेश्वर मंदिराचे (Sankareswar Temple) विश्वस्त बोडस कुटुंबीय, पडेल सरपंच भूषण पोकळे व गावातील ग्रामस्थांनी देवाची मूर्ती पाहण्यासाठी गर्दी केली. ही मूर्ती मंदिरामध्ये ठेवण्यात येणार असल्याची माहिती मंदिराचे विश्वस्त बोडस कुटुंबीयांनी दिली आहे. शंकराचे मंदिर हे पडेल गावातील बोडस कुटुंबीयांचे आहे. हे मंदिर फार पुरातन काळातील असल्याचे सांगण्यात येत आहे.