चिपळूण - तालुक्यातील दहा गावांना अवकाळी पावसाचा मोठा तडाखा बसला आहे. वादळी वारा व पावसाच्या तडाख्यात 100 घरांचे सुमारे 8 लाखांचे नुकसान झाले आहे. तालुक्यातील 184 शेतकर्‍यांच्या 68 हेक्टवरील शेतीचेही नुकसान झाले आहे. बोरगाव-चिवेली परिसरात अवकाळी पावसाचा मोठा तडाखा बसला आहे.

कोरोनाच्या पार्श्‍वभूमीवर संपूर्ण देश लॉकडाऊन आहे. खबरदारीचा उपाय म्हणून प्रत्येक नागरिकास घरी थांबण्याच्या सूचना देण्यात येत आहेत. उद्योग व्यवसाय बंद असल्याने अनेकांच्या हाताला काम नाही. त्यातच दोन दिवसांपूर्वी तालुक्यात वादळी वारा आणि पावसाचा तडाखा बसला. वेगवान वार्‍याने अनेकांच्या घरातील पत्रे उडून गेले. काही ठिकाणी मोठी झाडे कोसळून ती घरावर पडली. परिणामी घरांचे पत्रे, कौले कोसळून लाखोंचे नुकसान झाले आहे. 

हे पण वाचा - ...अन् काळजात चर्रर झालं! कपडे बदलायला घ्यावा लागतोल "ब्लॅंकेट'चा आधार! परिचारिकेने मांडली व्यथा 
 

यामध्ये तालुक्यातील बोरगाव, बामणोली, करंबवणे, तळवडे, कोळकेवाडी, भिले, कालुस्ते बु, चिवेली, खडपोली, कळकवणे या गावातील घरांचे आणि शेतीचे मोठे नुकसान झाले आहे. बोरगाव येथील 61 घरांना आणि 2 गोठ्यांना वादळी वार्‍याचा तडाखा बसला. त्यामुळे 4 लाख 88 हजार 525 रुपयाचे नुकसान झाले आहे. त्यानंतर बामणोली येथील 15 घरे व 5 गोठ्यांचे सव्वा लाखाचे नुकसान झाले आहे. या नुकसानीची संबंधित अधिकारी व कर्मचार्‍यांनी पाहणी केली आहे. त्यानुसार तालुक्यात सुमारे 8 लाखाचे नुकसान झाल्याचे निदर्शनास आले आहे. तालुक्यात दीर्घकाळानंतर वादळी पावसात गारांचा वर्षाव झाला. या गाराही मोठ्या होत्या. त्यामुळे शेतीलाही या वादळाची बाधा झाली. बोरगाव येथे 10 हेक्टर, भिले 12, कालुस्ते बु. 4, कालुस्ते खुर्द 7, तर धामेली 8 हेक्टर असे तालुक्यात एकूण 68 हेक्टरचे नुकसान झाले आहे. यामध्ये 184 शेतकर्‍यांना शेतीचे नुकसान सोसावे लागले आहे. उन्हाळा सुरू झाल्यानंतर प्रथमच अवकाळी पावसाचा तडाखा तालुक्याला बसला आहे. कोरोनामुळे हलाखीत असलेल्या ग्रामस्थांना अवकाळी पावसाने आणखी संकटात टाकले आहे.

हे पण वाचा - घरी येणाऱ्या नवीन पाहुण्याची चाहूल लागून नऊ महिने उलटले होते; पण...