महाड : भोंग्यांच्या आवाजावरून महाराष्ट्रात चांगलेच वादळ उठले आहे. भोंग्यांवर बंदी घालावी इथपासून आवाज व वेळेच्या मर्यादेपर्यंत भोंग्यांचा विषय चांगलाच गाजत राहिला. असे असले तरी यंदा नदीच्या पातळीनुसार महाडकरांसाठी सावध करणारे भोंगे महाडमध्ये वाजणार आहेत.

महाड शहर सावित्री व गांधारी नदीच्या संगमावर वसले आहे. त्यामुळे पावसाळ्यात नदीच्या पाण्याची पातळी वाढली की महाड शहरामध्ये पुराचा धोका निर्माण होतो. महाड शहराला दरवर्षी पूर परिस्थितीचा सामना करावा लागतो. गतवर्षी २२ जुलैला आलेल्या महापुराने सर्व महाडकरांचे अतोनात नुकसान केले. महाड नगर परिषदेच्या आपत्ती व्यवस्थापन विभागाकडून पूर परिस्थितीवर विशेष लक्ष दिले जात असून त्यामुळे आता महाडमध्ये भोंगे वाजणार आहेत. शहरामध्ये पुराच्या पाण्याच्या पातळीचा म्हणजेच पुराच्या धोक्याचा इशारा देण्यासाठी नगर परिषदेमार्फत तीन ठिकाणी भोंगे बसविण्यात आले आहेत. भोंग्यांचा कालावधी आणि संख्येवरून नागरिकांना पुराचा अंदाज बांधणे शक्य होणार आहे. महाड नगरपालिकेचे नवीन प्रशासकीय भवन, जुने कार्यालय व नेवनगर पोलिस वसाहत या ठिकाणी हे भोंगे बसवले जाणार असल्याची माहिती महाड नगरपालिकेचे मुख्याधिकारी महादेव रोडगे यांनी दिली.

असे वाजणार भोंगे

सावित्री नदीच्या पाण्याची पातळी पाच मीटर झाली की भोंगा एकदा २ मिनिटे वाजेल. पाण्याची पातळी साडेसहा मीटर व त्यावर गेली की भोंगा दोन वेळा २ मिनिटांसाठी वाजेल. यानंतर पाण्याची पातळी साडेसात मीटर व त्यावर आणि साडेआठ मीटर व त्यावर गेली की भोंगा दोन वेळा २ मिनिटे वाजेल; परंतु पाण्याची पातळी नऊ मीटर व त्यापुढे प्रत्येक मीटर वाढत गेला की भोंगा तीन मिनिटे तीन वेळा वाजवला जाणार आहे.