Crime News: प्रियकर अन्य मुलीशी बोलतो या रागातून सावंतवाडी तालुक्यातील एका तरुणीने आज सकाळी तलावात आत्महत्या करण्याचा प्रयत्न केला. मात्र, जागृत नागरिकांनी तिची समजूत काढत तिला आत्महत्येपासून परावृत्त केले.

संबंधित तरुणीचे एका तरुणाशी प्रेम संबंध जुळले होते. त्यांचा लग्न करण्याचा विचार होता. मात्र, तिचा प्रियकर अन्य एका तरुणीशी मोबाईलवर बोलतो, असे तिला आज तिच्या मैत्रिणीकडून समजले. या रागातून तिने प्रियकराला तलावाकाठी बोलावून जाब विचारला. मोबाईल हिसकावून घेत मारहाण केली. शाब्दिक बाचाबाचीनंतर राग अनावर झाल्याने तिने मोती तलावात आत्महत्या करण्याचा प्रयत्न केला; मात्र तेथे आलेल्या नागरिकांनी तिची समजून काढत तिला आत्महत्येपासून परावृत्त केले. शिवाय याबाबत पोलिसांना कल्पना दिली.

घटनास्थळी तत्काळ पोलिस निरीक्षक ऋषिकेश अधिकारी दाखल झाले. तत्पूर्वी प्रियकर घटनास्थळावरून पळून गेला होता. पोलिसांनी तरुणीला ताब्यात घेत पोलिस ठाण्यात नेले व संबंधित युवतीच्या आई-वडिलांसह प्रियकरालाही बोलावून घेतले व दोघांनाही समज दिली. यावेळी प्रियकराने संबंधित तरुणीशी लग्न करणार असल्याचे कबूल केले. (Latest Marathi News)