मेघीतील ‘ती’ वादग्रस्त लाकडे उचलली

साखरपा, ता. ३ : मेघी येथील ती वादग्रस्त लाकडे जागेतून उचलण्यात आली आहेत. मात्र ती लाकडे कुठे गेली, याची चर्चा गावात सध्या सुरू झाली आहे.
मेघी येथे वादळात पडलेली रस्त्याजवळील झाडे एका अज्ञात व्यक्तीने तोडून त्याची उचल करून गावातच एका ठिकाणी ती ठेवली होती. याबाबत माजी सरपंच प्रमिल चव्हाण आणि शिवसेना शाखा प्रमुख प्राणित बेटकर यांनी दखल घेत वनविभागाला याची कल्पना दिली होती. पण दोन दिवस वनविभागाने कोणतीही कार्यवाही केली नाही. माकडे मोजणी आणि सुट्टीचे कारण देत वनअधिकारी घटनास्थळी दाखल झाले नाहीत. या लाकडांच्या बाबतीत विद्यमान सरपंच शीतल हेगीष्टे आणि प्रभारी पोलिसपाटील विजित साळवी यांच्या निदर्शनास ही बाब आणून दिली होती. चव्हाण यांनी रविवारी लाकडे ठेवलेल्या ठिकाणी जाऊन पहाणी केली असता त्या ठिकाणी लाकडे दिसून आली नाहीत. त्यामुळे एका रात्रीत ही सर्व लाकडे गेली कुठे असा प्रश्न चव्हाण यांनी विचारला आहे.