रत्नागिरी : शासनाने मिनी लॉकडाउन केले आणि रत्नागिरीतील बाजारपेठ पूर्णतः ठप्प झाली. मेडिकल, किराणा, फळे-भाजी विक्रेते वगळता अन्य सर्वच दुकाने बंद आहेत. त्यामुळे रोजची सुमारे आठ कोटींची उलाढाल ठप्प झाली आहे. यात मोठा फटका सराफी पेढ्यांना बसला आहे. ऐन लग्नसराईत सराफींसह कपडे दुकाने बंद झाल्यामुळे त्यात भर पडली आहे. दुकानांमध्ये काम करणाऱ्यांचाही रोजगाराला ब्रेक लागला आहे.

शासनाने कडक निर्बंध लागू केले. यामध्ये जीवनावश्‍यक वस्तू वगळता, बाजारपेठेतील अन्य सर्व प्रकारची दुकाने बंद करण्याचे आदेश दिले. यावर व्यापारी संतापले असून दरदिवशी विविध प्रकारची आंदोलने करून सरकारचे लक्ष वेधण्याचा प्रयत्न सुरू झाला आहे. रत्नागिरी शहरासह आजूबाजूच्या परिसरातील छोट्या-छोट्या बाजारपेठांमध्ये कपडे, ज्वेलरी, चप्पल, मोबाईल यांसह अन्य प्रकारची सुमारे दीड हजार दुकाने आहेत.

हेही वाचा - पश्‍चिम महाराष्ट्र देवस्थानच्या अध्यक्षपदी संजय डी. पाटील?
 

शासनाच्या निर्णयामुळे दुकाने बंद झाली असून रोजचे व्यवहारही थांबले आहेत. मंगळवारी (ता. ६) दुपारनंतर अंमलबजावणी झाली. गेले दोन दिवस उलाढाल थांबली आहे. याचा सर्वाधिक फटका कपडे आणि सराफी दुकानांना बसला आहे. लग्नसराई आणि सोन्याचे दर घसरल्यामुळे ग्राहक सोन्यासह विविध साहित्य खरेदीकडे वळलेले आहेत. याचवेळी दुकाने बंद झाल्याने अडचणीत वाढ झाली आहे.

गुढीपाडव्याला सोन्याचे दागिने तयार करण्यासाठी झुंबड उडते. १३ एप्रिलला पाडवा असल्याने त्या दिवशीच्या मुहूर्तावर दागिने आणले जातात. ऐनवेळी बाजार बंद पडल्याचा मोठा फटका बसू शकतो. विवाह सोहळ्यांना परवानगी असली तरीही त्यासाठी आवश्‍यक वस्तूंची खरेदी कुठे करायची? हा प्रश्‍नच आहे. याकडे शासनाने गांभीर्याने पाहावे, अशी व्यापाऱ्यांकडून मागणी होत आहे.

‘दुकाने उघडायला परवानगी द्या’

प्रशासनाने रस्त्यावर उतरू नका, असे आवाहन केले आहे. कायदा व सुव्यवस्था निर्माण होणार नाही, अशा पद्धतीने सर्व व्यापारी सनदशीर मार्गाने आंदोलन करतील. मुख्यमंत्री, आमदार, खासदार यांना एसएमएसद्वारे ‘दुकाने उघडायला परवानगी द्या’, असे मेसेज करणारे आंदोलन करणार असल्याची माहिती रत्नागिरी व्यापारी महासंघाचे तालुकाध्यक्ष निखिल देसाई यांनी दिली.

हेही वाचा - वैभववाडी तालुक्यात कोरोनापाठोपाठ तापसरीनेही काढले डोके वर

एक नजर..

• रत्नागिरी शहरासह परिसरात छोट्या-छोट्या बाजारपेठा 
• कपडे, ज्वेलरी, चप्पल, मोबाईल आदी दुकाने  
• विविध प्रकारच्या सुमारे दीड हजार दुकानांचा समावेश 
• शासनाच्या निर्णयामुळे दुकाने बंद, व्यवहारही थांबले 
• दुकानांतील कामावर अवलंबून असणाऱ्यांचा उदरनिर्वाहाचा

प्रश्‍न

• १३ एप्रिलला गुढी पाडवा; खरेदी कोठे करायचा हा प्रश्‍न
• गेले दोन दिवस उलाढाल थांबली; व्यावसायिकांना फटका
   

"दुकाने अचानक बंद केल्यामुळे गुढीपाडव्याच्या विक्रीची सराफींची तयारी अर्धवट राहिली आहे. दर कमी असल्यामुळे सोने खरेदीसाठी ग्राहक येत आहेत. या परिस्थितीत झालेले लॉकडाउन सराफींना अडचणीचे आहे."
 

- प्रमोद खेडेकर, सराफी व्यावसायिक