चिपळूण : तालुक्यात गेल्या 2 दिवसांपासून पावसाला चांगली सुरवात झाली आहे. या पावसात (Monsoon) परशुराम घाटात (Parashuram Ghat) किरकोळ स्वरूपात दरडी कोसळण्याच्या घटना सातत्याने घडून लागल्या आहेत.

घाटातील सिंगल लेनचे काँक्रिटीकरण पूर्ण झाले असून एकेरी मार्गावरून वाहतूक सुरू झाली आहे. गेल्या ३ वर्षांपासून परशुराम घाटातील चौपदरीकरणाचे काम रखडले होते; मात्र यावर्षी पावसाळ्यापूर्वी घाटातील डोंगरकटाई पूर्ण झाली असून काँक्रिटीकरणाचा एकेरी मार्ग पूर्ण झाला आहे.

परशुराम घाटाची लांबी सुमारे साडेतीन किमी आहे. चौपदरीकरणातील बहुतांशी कामे मार्गी लागल्यानंतर पहिल्या पावसाळ्यात दरडीचा धोका जाणवू लागला आहे. सलग दोन दिवस झालेल्या पावसात दोनदा किरकोळ स्वरूपाच्या दरड कोसळण्याच्या घटना घडल्या.

चिपळूण हद्दीतील सरंक्षक भिंतीची कामे मार्गी लागली असली तरी महाड हद्दीतील कामे झालेली नाहीत. जेथे मातीचा भराव आहेत तेथे प्लास्टिकचे आच्छादन टाकण्यात आले आहे. एखाद्या वेळेस दरड कोसळल्यास जेसीबी, पोकलेन, ग्रेडर व डंपरची व्यवस्था आहे. शनिवारी महाड हद्दीत असलेल्या परशुराम घाटात काही डोंगरातील काही दगड रस्त्यावर आले होते.

मात्र, त्याचा वाहतुकीवर परिणाम झाला नाही. डोंगर कटाईनंतरच्या पहिल्याच पावसात दगड माती कोसळण्याचा धोका असल्याने दरडीच्या बाजूने सिंगल लेनवरून वाहतूक सुरू ठेवली आहे. घरांच्या सुरक्षेसाठी सरंक्षक भिंत उभारण्याची मागणी ग्रामस्थांनी केली होती; मात्र त्यास सुरुवात झालेली नाही. महाड हद्दीतील सरंक्षक भिंतीची कामे अपूर्ण राहिल्याने दरडीचा धोका कायम आहे.

काँक्रिटीकरणाच्या महामार्गावर पहिल्याच पावसात वालोपे येथे खड्डा पडला. त्यामुळे काही ठिकाणी महामार्गाच्या कामाच्या गुणवत्तेबाबत प्रश्नचिन्ह आहे. परशुराम, पेढे गावाला दरडीचा धोका आजही कायम असून ग्रामस्थांच्या मागणीनुसार संरक्षक भिंती बांधण्यात आलेल्या नाहीत. दुर्गवाडी येथील तसेच परशुराम आणि पेढे परिसरातील जवळपास ६० ते ७० घरांना दरडींचा धोका कायम आहे.

-गायत्री जोगळे, सरपंच, प्रणित गुरव, उपसरपंच-परशुराम