सिंधुदुर्ग : विकासकामाला विरोध करायचा आणि उद्घाटनाच्या वेळी 'आयत्या बिळावर नागोबा' सारखे यायचे याला शिवसेना म्हणतात, अशी खरमरीत टीका माजी मुख्यमंत्री नारायण राणे यांनी केली. केंद्रीय अर्थमंत्री अमित शहा यांच्या उपस्थित पडवे येथील मेडिकल कॉलेजच्या उद्घाटन प्रसंगी त्यांनी सत्ताधाऱ्यांवर निशाणा साधला. यावेळी भाजप प्रदेशाध्यक्ष चंद्रकांत पाटील, माजी मुख्यमंत्री देवेंद्र फडणवीस, विरोधी पक्षनेते प्रवीण दरेकर, विनोद तावडे, रवींद्र चव्हाण आदी मान्यवर उपस्थित होते. 

राणे म्हणाले, या कॉलेजचे बांधकाम सुरु करत असताना पहिला विरोध शिवसेनेने केला होता. उद्घाटन प्रसंगी नवीन हॉस्पिटल मंजूर करू आणि त्याला ९०० कोटी रुपयांचा निधी उपलब्ध करुन देऊ असे आश्वासनही त्यावेळी शिवसेनेने दिले होते. मात्र यांच्या तिजोरीत एकही पैसा नाही आणि हे ९०० कोटी कसे काय देणार? अशी टिकाही त्यांनी केली. 

हेही वाचा - शिष्यवृत्तीत पश्‍चिम बंगालचे कनेक्‍शन ; २०० शाळांमधून साडेतेराशे नावे बनावट -

कोकणात चिपी विमानतळ तयार आहे. शिवसेनेचे लोकप्रतिनिधी रोज उद्घाटन होणार म्हणून सांगतात. परंतु जेव्हा मी विमानतळाचे काम सुरू केले, तेव्हा पहिले आंदोलन आणि विरोध शिवसेनेने केला होता याची आठवणही राणे यांनी करून दिली. 

यावेळी नारायण राणे यांनी विद्यार्थ्यांना या महाविद्यालयाच्या माध्यमातून दर्जेदार शिक्षण घ्या आणि देशासाठी, राज्यासाठी उत्तम डॉक्टर म्हणून नावारूपाला या, उत्कृष्ट निकाल मिळवून द्या असे आवाहन केले.