चिपळूण - केंद्रीय मंत्री नारायण राणे हे वालोपे येथून बहादूरशेख नाका येथे येताच शिवसेनेच्या कार्यकर्त्यांनी प्रचंड घोषणाबाजी केली. मुख्यमंत्र्यावर केलेल्या टीकेवरून शिवसैनिकांनी राणे यांच्या विरोधात आक्रमक झाले. दरम्यान शिवसेनेकडून जहरी निषेध केला जात असल्याने राणे समर्थक, भाजप कार्यकर्ते रस्त्यावर उतरले. त्यांनीही शिवसेनेच्या विरोधात घोषणाबाजी केली. यावरून चिपळुणात प्रचंड तणाव निर्माण झाला होता.

बहादूर शेख नाका येथील डॉ. बाबासाहेब आंबेडकर पुतळ्यासमोरच राणे समर्थक आणि भाजप कार्यकर्त्यांनी शिवसेनेच्या विरोधात घोषणा दिल्यामुळे शिवसेना आणि राणे समर्थकांमध्ये प्रचंड तणावाचे वातावरण निर्माण झाले होते. मात्र पोलिस अधीक्षक गर्ग व त्यांच्या सहकाऱ्यांनी ही परिस्थिती कुशलतेने हाताळली. केंद्रीय मंत्री नारायण राणे यांच्या विरोधात नाशिक येथे गुन्हा दाखल झाल्यानंतर तेथील पथक चिपळुणात रवाना झाले होते. दरम्यान मंत्री राणे सायंकाळीच चिपळूणात दाखल झाले.

सकाळी साडेदहाच्या सुमारास राणे यांचे बहादूर शेख नाका येथे आगमन झाले. राणे येण्यापूर्वीच वीस-पंचवीस शिवसैनिकांचा जमाव बहादूर शेख नाका येथे आला. त्यांना चिपळूण कराड मार्गावरील डॉ. बाबासाहेब आंबेडकर पुतळ्यालगत असलेल्या फुलावरच पोलिसांनी रोखले. त्यावरून पोलिस आणि शिवसैनिकांमध्ये काही प्रमाणात वादावादी झाली. पोलिसांनी रोखल्याने शिवसैनिकांनी राणेंविरोधात घोषणाबाजी सुरू केली. दरम्यान काही वेळातच नारायण राणे यांचे वालोपे येथून बहादूर शेख नाका येथे आगमन झाले. त्यांनी डॉ. बाबासाहेब आंबेडकर यांच्या पुतळ्यास अभिवादन केले.

विविध संघटनांनी व भाजप पदाधिकारी नेत्यांचा सत्कार केला, स्वागत केले. याचवेळी समोरून शिवसैनिकांची तीव्र स्वरूपाचे घोषणाबाजी सुरू असल्याने राणेसमर्थक आणि भाजप कार्यकर्ते संतप्त झाले. त्यांनीही रस्त्यावर येऊन शिवसैनिकांनी विरोध शिवसेनेच्या विरोधात घोषणाबाजी सुरू केली. त्यामुळे मोठा तणाव निर्माण झाला होता. पोलिस अधीक्षक गर्ग व त्यांचे सर्व सहकारी दोन्ही गटांना रोखण्याचा प्रयत्न करत होते. बहादूर शेख नाका इथून राणे अभिरुची हॉटेल अभिरुची येथील बैठकीसाठी गेल्यानंतर वातावरण काहीसे निवळले.