रत्नागिरी : निसर्ग चक्रीवादळातून जनजीवन, उद्योग व्यवसाय पूर्वपदावर येण्याकरिता बराच कालावधी लागेल. अन्न, वस्त्र, निवारा, वीज, पाणी या गरजा भागवण्यासाठी युद्धपातळीवर प्रयत्न सुरू आहेत; परंतु उद्योग व्यवसाय, उत्पन्नाची साधने नव्याने निर्माण करावी लागणार आहेत. यासाठी स्थानिक स्वराज्य संस्था, तंत्रज्ञ, कृषी विद्यापीठ यांची यंत्रणा उभी करावी लागेल. सहा महिने, वर्ष नव्हे, तर किमान १० वर्षे कायमस्वरूपी काम करावे लागेल, असे प्रतिपादन केळशीतील महेश परांजपे यांनी केले.

ते म्हणाले, आंबा, काजू, नारळ, पोफळी अशा पीकांसाठी तत्काळ उपाययोजना करण्याची गरज आहे. जागा रिकामी केल्यास तिथे कमी खर्चात आंतरपिक घेता येईल. केळशी गावाचा विचार करता, येथील आंबा उत्पादक सहकारी संस्था जिल्ह्यात अग्रगण्य आहे. आंबा उत्पादक सभासद व बिगर सभासदांना मदत करणे शक्‍य आहे. कोकण कृषी विद्यापीठाच्या मार्गदर्शक सूचनांनुसार ही मदत करता येईल. हापूसच्या जीआय मानांकनासाठी एजन्सी म्हणूनही ही संस्था काम करते. संस्थेने शेतकऱ्यांसाठी उपक्रम तयार करावा.

हेही वाचा- नदीकाठी लोकांचे  सुरू झाले स्थलांतर ः कुठे पहा  |

गरजेनुसार पाच-दहा टीम तयार कराव्यात. या टीम सदस्यांना झाडे तोडणी व अन्य सुरक्षिततेचे प्रशिक्षण देऊन दररोज झाडे तोडणी व पाठपुरावा करता येईल. बागा उद्‌ध्वस्त झाल्याने पडलेली झाडे बाजूला करून ती लाकूडफाटा बागेपासून थोडी लांब न्यावीत. कारण अस्तित्वात असणाऱ्या झाडांना खोडकिडीचा प्रादुर्भाव होण्याची भीती आहे. माती सैल झाल्याने हललेल्या झाडांच्या मुळाशी टाळमाती घातली पाहिजे. कारण पाणी लागून मुळे कुजण्याची भीती परांजपे यांनी व्यक्त केली आहे.

हेही वाचा- हौसेला मोल नाही ;  चार हजार रुपयाचा बनवला त्याने चांदीचा मास्क... -

नियम शिथिल करावेत. पावसात रान वाढले की पडलेली झाडेसुद्धा दिसणार नाहीत. त्यामुळे ती वेळीच तोडावीत व लाकडे विकता येतील किंवा इंधनासाठी वापरता येतील. यासाठी शासनाने वाहतूक व तोडकामाचे नियम शिथिल करावेत, असे मत श्री. परांजपे यांनी मांडले.