राजापूर - पावसाच्या आश्‍वासक सुरवातीमुळे शेतकर्‍यांनी दणक्यात भातलावणीच्या कामाला सुरवात केली होती. मात्र गेल्या दोन दिवसांपासून पावसाने दडी मारल्याने शेतकर्‍यांच्या चेहर्‍यावर चिंतेचे ढग जमा झाले आहेत. लावणी करण्यासाठी काढलेली भाताची रोपे पाण्याअभावी रखरखत्या उन्हात सुकू लागली आहेत. लावणी केलेल्या भातशेतीच्या जमिनीमध्ये पाण्याअभावी भेगा पडू लागल्या आहेत. 

‘निसर्ग’चक्रीवादळाच्या साथीने पावसाने यावर्षी दमदार आणि आश्‍वासक सुरवात केली. त्यामुळे सुखावलेल्या शेतकर्‍यांनी लागलीच भातशेतीच्या कामांना सुरवात केली. भातपेरणीच्या कामासह मशागतीची कामेही लागलीच पूर्ण करून घेतली. पावसाचे सातत्य कायम राहिल्याने शेतकर्‍यांनी गेल्या काही दिवसांपासून भातलावणीच्या कामांना सुरवात केली. त्यानंतर गेल्या दोन दिवसांपासून नेहमीप्रमाणे पावसाने दडी मारली आहे. त्यामुळे भातलावणीच्या कामांना ‘ब्रेक’ लागला आहे. काही शेतकर्‍यांनी पाऊस पडेल या आशेवर लावणीसाठी भाताची रोपे काढून ठेवली आहेत. त्यांची लावणी झाली नसल्याने ती रखरखत्या उन्हामध्ये सुकून जाऊ लागली आहेत. आणखीन काही दिवस पाऊस लांबणीवर पडल्यास ती रोपे मरून जाण्याची भीती व्यक्त केली जात आहे. दुसर्‍या बाजूला लावणी केलेल्या मळ्यांमध्ये पाण्याअभावी भेगा पडू लागल्या आहेत. लावणी केलेली रोपे सुकून मरण्याची भीती व्यक्त केली जात आहे. दडी मारलेला पाऊस आणखीन काही दिवस लांबणीवर पडल्यास त्याचा फटका भातशेतीला बसणार आहे. 

हे पण वाचा -  त्या चौदा जणांना कोरोनाची लागण नसल्याचे काळाले अन् आरोग्य कर्मचाऱ्यांनी सोडला सुटकेचा श्वास

लावणीसाठी पंपाची मदत

पावसाने दडी मारल्याने शेतकर्‍यांनी भात लावणीसाठी पाणी उपलब्ध करण्याच्या उद्देशाने डिझेल वा पेट्रोल पंपाचा आधार घेतला आहे. खर्च आणि मेहनतीच्या तुलनेमध्ये उत्पन्न कमी येत असल्याने आधीच शेतीबाबत नाराजीचा सूर काढला जात आहे. त्यामध्ये पेट्रोलच्या दरामध्ये झालेल्या वाढीची भर पडली आहे. मात्र रोपे सुकू लागल्याने शेतकर्‍यांनी पंपाच्या साह्याने लावणी सुरू केली आहे.