सावंतवाडी : शरद पवार यांच्यामुळेच अजित पवारांना राजकारणात संधी मिळाली, पण त्यांना मोठा नेता मानण्याचे कारण नाही, अशी टीका माजी खासदार तथा भाजपचे पदाधिकारी निलेश नारायण राणे यांनी ट्वीटद्वारे केली आहे.

सध्या किरीट सोमय्या यांच्या आरोपांमुळे राजकारण पेटले आहे. भाजपचे प्रदेशाध्यक्ष चंद्रकांत पाटील यांनी याच विषयावरून महाविकास आघाडीतील नेत्यांवर टीका केली होती. पुण्यातील एका पत्रकार परिषदेत त्यांनी अजित पवार यांच्याबाबतही वक्तव्य केले. यात त्यांनी देवेंद्र फडणवीस हे दबंग नेते आहेत. ते शंभर अजित पवार खिशात घेवून फिरतात अशी टिका केली होती. यावरून राजकीय वाद निर्माण झाला.

ट्वीट करून निलेश राणे यांनीही या वादात उडी घेतली आहे. त्यांनी म्हटले आहे की, चंद्रकांत पाटील अजित पवारांवर बोलल्यावर नेमके राष्ट्रवादीवालेच विस्कटले. अजित पवार मोठे नेते नाहीत, त्यांना मोठा नेता मानण्याचे कारणही नाही. त्यांना राजकारणात जी संधी मिळाली ती फक्त पवार साहेबांमुळे; पण त्यांनी घाण केली. त्यांच्या मंत्रीपदाचा महाराष्ट्राला काडीचा फायदा झाला नाही.