कणकवली : सिंधुदुर्गचे पालकमंत्री उदय सामंत (Uday Samant) यांचे भाऊ जिल्‍हा प्रशासनावर दबाव आणत आहेत. कामकाजात हस्तक्षेप करत आहेत. याबाबतचे पुरावे आमच्याकडे आहेत असा आरोप आमदार नीतेश राणे (Nitesh Rane) यांनी आज केला.

येथे राणे यांनी पत्रकार परिषद घेतली. ते म्‍हणाले, ``सिंधुदुर्गात हप्ते वसुली सुरू केली आहे. पारंपरिक गरीब मच्छिमार आणि पर्ससीन नेटधारक यांच्याकडूनही पैसे घेतले जात आहेत. एलईडी आणि पर्ससीन मच्छीमारी देखील यांच्याच पाठबळावर सुरू असावी असाही आमचा संशय आहे. याबाबतची तक्रार मत्स्य खात्‍याचे मंत्री अस्लम शेख यांच्याकडे केली होती; मात्र पुढे कोणतीच कार्यवाही झाली नाही.

जिल्‍हा परिषद सदस्य, नगरसेवक यांना आपल्‍या पक्षात घेण्यासाठीही पालकमंत्री आणि त्‍यांच्या भावाकडून लाखो रुपयांची उधळण केली जातेय. या दोहोंची सिंधुदुर्गात पैशाचा खेळ चालवला आहे. सिंधुदुर्गच्या राजकारणात नवा पायंडा पाडला जातोय. त्‍यामुळे पालकमंत्र्यांच्या भावाची ॲन्टी करप्शन आणि ईडी विभागामार्फत चौकशी होण्याबाबतची मागणी आम्‍ही करणार आहोत.

ते म्हणाले, ``पालकमंत्री उदय सामंत यांचे बंधू यांना पुढची खासदारकी लढवायची आहे. यासाठी ते नगरसेवक, जिल्‍हा परिषद सदस्य यांची फोडाफोडी करत आहेत. त्याचबरोबरच खासदार विनायक राऊत आणि काही निष्‍ठावंत शिवसेना पदाधिकारी यांच्या विरोधातही कारस्थाने करत आहेत.`

सरपंचांच्या जीवापेक्षा फोडाफोडीला प्राधान्य

कोरोना संसर्ग रोखण्यात गावागावातील सरपंचांनी जिवाचे रान केले. अनेक सरपंचांची कुटुंबे, नातेवाईक कोरोना बाधित झाले. काही सरपंचांना जीव गमवावा लागला. जिल्ह्यातील सर्व सरपंचाचा विमा उतरविण्याची घोषणा पालकमंत्र्यांनी केली होती; पण प्रत्‍यक्षात काहीही कार्यवाही झाली नाही. त्‍यांच्याकडे लोकप्रतिनिधी फोडण्यासाठी लाखो रूपये आहेत; पण सरपंचांना विमा उतरविण्यासाठी ते पैसे खर्च करू शकत नाहीत हे दुर्दैव असल्‍याचे श्री.राणे म्‍हणाले.