देवरुख - शेजाऱ्याने फावड्याने केलेल्या हल्ल्यात एक जण जागीच ठार झाला तर एक महिला गंभीर जखमी झाली आहे. ही घटना आज दुपारी बेलारी साप्तेवाडीत घडली. संदीप अर्जुन साप्ते (३०) असे मृत युवकाचे नाव आहे तर त्याची आई अरुणा अर्जुन साप्ते (५०) या गंभीर जखमी झाल्या आहेत. त्यांची प्रकृती चिंताजनक असून त्यांच्यावर जिल्हा रुग्णालयात उपचार सुरु आहेत.

याबाबत घटनास्थळावरुन मिळालेली माहिती अशी, घटनेतील मयत आणि संशयित यांची बेलारी साप्तेवाडीत शेजारी घरे आहेत. आज सकाळी संदीपचे वडील अर्जुन हे कामानिमित्त देवरुखला गेले होते. याचा फायदा घेत सखाराम बाबाजी साप्ते (५०) याने संदीपच्या घरात घुसून त्याला फावड्याने मारण्यास सुरुवात केली. यावेळी संदीपची आई अरुणाने त्याला अडविण्याचा प्रय़त्न केला. सखारामने तिलाही फावड्याने मारहाण केली.

दरम्यान संदीपवर फावड्याचे ५ ते ६ वार झाले यात त्याच्या डोक्याला गंभीर इजा झाल्याने तो जागीच ठार झाला. या हल्ल्यात अरुणा या सुद्धा गंभीर जखमी झाल्या आहेत. 

संदीपच्या घरात सुरु असलेली गडबड ऐकून शेजारी धावले मात्र तोपर्यंत उशीर झाला होता. संदीप व त्याच्या आईला उपचारासाठी देवरुखला आणण्यात आले मात्र संदीपला मृत घोषित करण्यात आले. 

घटनेची माहिती समजताच  देवरुख पोलिस निरीक्षक श्री पाटील आणि सहकारी घटनास्थळी दाखल झाले. घटनास्थळी पंचनामा करण्यात आला. यावेळी पोलिसांनी सखारामचा शोध घेतला असता तो सापडला नाही. या घटनेची नोंद करण्याचे काम देवरुख पोलीस ठाण्यात सुरु आहे.  देवरुख ग्रामीणमध्ये शवविच्छेदनाची सोय नसल्याने संदीपचा मृतदेह विच्छेदनासाठी संगमेश्वरला पाठवण्यात आला आहे.