रत्नागिरी : शिवसेना - भाजपमध्ये जोरदार चुरस असल्याने तालुक्‍यातील मिऱ्या ग्रामपंचायतीची निवडणूक प्रतिष्ठेची झाली आहे. बिनविरोधचा प्रयत्न फसल्यानंतर तेथे प्रचाराचा धुरळा उडत आहे. याचबरोबर ही ग्रामपंचायत चर्चेत आली आहे ती कोट्यवधीची मालमत्ता असलेल्या एका महिला उमेदवारामुळे. आदिती भैय्या भाटकर असे त्या महिला उमेदवाराचे नाव आहे. 

मिऱ्या ग्रामपंचायत ही ११ सदस्यांची आहे. भाजपचे माजी आमदार बाळ माने यांच्या होमपिचवरील ही ग्रामपंचायत असल्याने तेथे यापूर्वी भाजपचे वर्चस्व होते; मात्र शिवसेनेने हे वर्चस्व मोडीत काढत ही ग्रामपंचायत ताब्यात घेतली आहे. कधी भाजप, तर कधी शिवसेना अशी सत्तेच्या खुर्चीची अदलाबदल होत असते. या पंचवार्षिक निवडणुकीला ही ग्रामपंचायत बिनविरोध करण्याचा प्रयत्न दोन्ही पक्षांकडून झाला.

हेही वाचा - घोषणा इतकी लोकप्रिय झाली की, पॅनेलला उमेदवारच मिळाले नाहीत

अडीच-अडीच वर्षे सरपंचपदाचा फॉर्म्युला ठरला. पण माशी शिंकली आणि बोलणी फिस्कटली. त्यामुळे ११ जागांवर आता शिवसेना, भाजपचे उमेदवार असून काही अपक्षांचाही यात समावेश आहे. या ग्रामपंचायतीची सर्वात जास्त चर्चा आहे ती एका महिला उमेदवाराची. उमेदवारी अर्ज सादर करताना स्थावर व जंगम मालमत्तेची इत्यंभूत माहिती निवडणूक विभागाला प्रतिज्ञापत्राद्वारे द्यावी लागते. त्यामध्ये मिऱ्या येथील तरुण कार्यकर्ता भैय्या भाटकर यांच्या पत्नी आदिती यांची. त्या प्रभाग क्र. ४ मधून निवडणूक रिंगणात असून ‘शिट्टी’ हे चिन्ह त्यांना मिळाले आहे. त्यांनी प्रतिज्ञापत्रात दाखविलेली मालमत्ता कोट्यवधीची असल्याचे नमूद केले आहे.

संपादन - स्नेहल कदम