लांजा (रत्नागिरी) : डुकरासाठी लावलेल्या फासकीत अडकून मादी बिबट्याचा मृत्यू झाल्याची घटना मंगळवारी लांजा शहरातील मधली कुंभारवाडी येथे घडली. दरम्यान, या घटनेनंतर फासकीचा मुद्दा पुन्हा एकदा ऐरणीवर आला आहे. 

मंगळवारी सकाळी लांजा शहरातील मधली कुंभारवाडी येथील काही स्थानिक ग्रामस्थांना येथील पुरुषोत्तम आत्माराम कुंभार यांच्या मालकीच्या जागेत ओढ्यालगत असलेल्या एका झाडाला अज्ञात व्यक्तींनी लावलेल्या फासकीत अडकून मृतावस्थेतील बिबट्या आढळून आला होता. याची खबर ग्रामस्थांनी लांजातील वनखात्याला दिली. त्यानंतर त्या ठिकाणी परिक्षेत्र वन अधिकारी प्रियांका लगड, लांजा वनपाल सागर पाताडे हे सहकाऱ्यांसह घटनास्थळी दाखल झाले. सदरचा बिबट्या मादी जातीचा असून तो चार ते पाच वर्षे वयाचा आहे. 

हा बिबट्या रात्री या ठिकाणी फासकीत अडकला असल्याचा अंदाजही त्यांनी व्यक्त केला आहे. दरम्यान वनखात्याच्या अधिकाऱ्यांनी वनरक्षक विक्रम कुंभार, वनमजूर खेडेकर तसेच प्राणीमित्र सचिन जाधव व अन्य ग्रामस्थांच्या सहकार्याने मृत बिबट्याची फासकीतून सोडवणूक केली. त्याचा मृतदेह शवविच्छेदनासाठी रत्नागिरी येथे नेण्यात आला आहे. दरम्यान डुकरांसाठी लावलेल्या फासकीत अडकून या बिबट्याचा मृत्यू झाल्याच्या घटनेनंतर फासकीचा मुद्दा पुन्हा एकदा ऐरणीवर आला आहे. 

हेही वाचा - सरनाईक आणि  वायकर यांचं भुयारी गटार कलाननगरकडेच -

संपादन - स्नेहल कदम